Çdo ndodhë me pronat e konfiskuara? – Qeveria përcakton procedurat si do jepen me qira, huapërdorje dhe rastet e tjetërsimit
Nga kalimi në administrim te institucionet shtetërore, te dhënia në huapërdorje apo me qira, deri te tjetërsimi apo shitja në ankand. Përmes një vendimi që mban datën 11 nëntor, Këshilli i Ministrave ka përcaktuar procedurat e dhënies në përdorim apo të tjetërsimit të pasurive të konfiskuara të krimit e korrupsionit.
Mënyra e përdorimit apo e tjetërsimit të pasurive të konfiskuara vendoset nga Komiteti Ndërinstitucional për Masat kundër Krimit të Organizuar, në bazë të raportit tekniko-financiar dhe të nevojave të institucioneve të përcaktuara në ligjin për parandalimin dhe goditjen e krimit të organizuar, trafikimit, korrupsionit dhe krimeve të tjera nëpërmjet masave parandaluese kundër pasurisë.
Format e përdorimit të pasurive të konfiskuara janë: a) kalimi në përgjegjësi administrimi për institucionet qendrore dhe kalimi në përdorim për njësitë e vetëqeverisjes vendore; b) dhënia në huapërdorje, për subjektet e tjera përfituese; c) dhënia me qira.
Dhënia me qira e pasurive të konfiskuara do të përdoret nga Agjencia si forma kryesore të sigurimit të të ardhurave nga administrimi i pasurive të konfiskuara. Për caktimin e çmimeve të dhënies me qira, kryeadministratori ngre rast pas rasti një komision për vlerësimin e tregut, i cili duhet të bëjë vlerësimin e tregut duke u bazuar në: akte ligjore në fuqi, që përafrojnë vlerësimin me zonat kadastrale ku ndodhet pasuria; vlerësimin e ekspertit; çmimet e aplikuara në zonën përreth pasurisë së konfiskuar; ç) çmimet zyrtare për objekte të së njëjtës natyrë; d) si dhe kushtet dhe rrethanat në të cilat ndodhet pasuria.
Menjëherë pas caktimit të çmimit të qirasë, në rast se pranë Agjencisë ka shprehje interesi për marrjen me qira, kryeadministratori do të lidhë kontratën e qirasë për pasurinë, e cila hartohet mbështetur në Kodin Civil të Republikës së Shqipërisë.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.