Çelet festivali i armëve në SHBA – Vjen në kulmin e debatit, opinioni ndahet në “dysh”
Vetëm pak ditë pas masakrës së Las Vegasit në një koncert të muzikës ‘country’ ku mbetën të vdekur 59 persona dhe qindra të tjerë u plagosën, në Pensilvani është çelur festivali i armëve.
Ky lloj eventi është ndër më të mëdhenjtë në llojin e tij dhe vjen pikërisht në kulmin e debatit për kontrollin e armëve. Personit përgjegjës për masakrën e Las Vegasit i`u gjetën mbi 20 lloje të ndryshme armësh në dhomën e hotelit.
Gjetja e një arsenali të tillë armësh, pronar i të cilave ishte një person i vetëm, me një të shkuar jo edhe aq të pastër, ka bërë që debati për armët në Shtetet e Bashkuara të dalë sërish në skenë.
Administrata e shkuar, e drejtuar nga Barack Obama bëri çdo përpjekje të mundshme për të kaluar një ligj më të rreptë në këtë drejtim, por pa i`a dalë dot mbanë. Edhe Hillary Clinton e kishte vendosur çështjen në krye të axhendës së saj. Sa i përket Donald Trump, duke se çështja as që nuk hyn në axhendën e tij.
“Unë nuk besoj se do të kishte ndonjë ligj që mund të kalojë tani e që të mund të ndalojë njerëzit që të kryejnë akte të tilla. Aktualisht, ka rreth 20 mijë ligje për armët në shtetet e bashkuara”, shprehet një tregtar armësh në festivalin e pensilvenisë.
“Unë do t`i mbështesja kufizimet, pasi nuk shoh asnjë arsye pse dikush duhet të ketë armë të tilla. Kjo është një armë lufte”-shprehet një vizitore në festival.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.