Çelik, mallrat luksoze, karburant avionësh dhe më shumë – Ja sanksionet e reja të BE-së që priten të vendosen ndaj Rusisë

Bashkimi Evropian po punon për një paketë të re sanksionesh kundër Rusisë që ka të ngjarë të kufizojë dhënien me qira të aeroplanëve dhe importin dhe eksportin e produkteve si karburantet e avionëve, produktet e çelikut dhe mallrat luksoze, kanë thënë për CNBC dy burime me njohuri mbi diskutimet.

Megjithatë, blloku mbetet i ndarë nëse do t’i shtrijë ato sanksione për importet e energjisë, pavarësisht provave në rritje të krimeve të luftës të kryera nga forcat ruse në Ukrainë.

Prokurori i lartë i Ukrainës ka thënë se 410 trupa janë gjetur në qytetet e rimarrë nga forcat ruse në tërheqje rreth Kievit, si pjesë e një hetimi për krime të mundshme lufte. Gjatë fundjavës, organizata të ndryshme mediatike ndërkombëtare raportuan për vrasjet masive të civilëve në qytetin Bucha, një qytet ukrainas afër kryeqytetit të vendit, Kiev, i cili deri vonë ishte nën pushtimin rus.

Raportet çuan në një sërë thirrjesh nga brenda Bashkimit Evropian që blloku të shkojë më tej në ndëshkimin e Moskës për pushtimin e saj të paprovokuar të Ukrainës. Blloku tani po punon për një paketë të pestë sanksionesh kundër Rusisë me raundin e ri të masave që pritet të miratohet më vonë këtë javë.

Dy zyrtarë të BE-së, të cilët nuk deshën të përmenden për shkak të natyrës së ndjeshme të bisedimeve, i thanë CNBC se një propozim për paketën e ardhshme të sanksioneve përfshin dhënien me qira të avionëve, produkte çeliku, mallra luksi dhe karburant avioni. Të dy burimet shtuan se paketa është ende një punë në progres dhe mund të ndryshojë ndërsa bisedimet vazhdojnë në ditët në vijim dhe përpara një takimi vendimtar të ambasadorëve të BE të mërkurën.

Një nga zyrtarët shtoi se “natyrisht, mungon një komponent i madh”, në lidhje me mungesën e masave për sektorin energjetik rus.

Vendosja e një ndalimi të menjëhershëm të gazit, naftës apo edhe qymyrit rus ka qenë një temë e debatit të madh brenda BE-së që kur Rusia pushtoi Ukrainën më 24 shkurt. Ndërsa disa vende mbështesin ndalimin e energjisë ruse, vende të tjera të BE-së argumentojnë se ato janë shumë të varura për energjinë ruse dhe ata do të dëmtonin më shumë ekonomitë e tyre sesa të Rusisë.

Presidenti i Francës, Emmanuel Macron, tha të hënën se BE-ja duhet të bie dakord për kufizimin e naftës dhe qymyrit rus pas mizorive të raportuara në Bucha. Polonia, për shembull, njoftoi muajin e kaluar se do të ndalonte importet e qymyrit rus.

Megjithatë, ekziston një grup shumë i zëshëm i vendeve të BE-së që janë ende kundër miratimit të çdo sanksioni energjetik.

“Ne duam të jemi, në një kohë të shkurtër, më pak të varur nga importet ruse të energjisë në Bashkimin Evropian dhe Gjermania do të mbështesë sanksione të mëtejshme ndaj Rusisë”, tha ministri gjerman i Financave, Christian Lindner, për CNBC në Luksemburg të hënën.

“Duhet të bëjmë më shumë presion mbi Putinin dhe duhet të izolojmë Rusinë, duhet të ndërpresim të gjitha marrëdhëniet ekonomike me Rusinë, por për momentin nuk është e mundur të shkurtojmë furnizimet me gaz”, shtoi ai.

Kur u pyet nëse për momentin, siç sugjeroi Macron, BE duhet të ecë përpara me sanksionet për naftën dhe gazin, Lindner tha: “Asnjë spekulim nga unë”.

Homologu i tij austriak ishte gjithashtu kundër vendosjes së një ndalimi për gazin rus.

“Austria nuk është në favor të më shumë sanksioneve në lidhje me gazin. Ne jemi shumë të varur nga gazi rus dhe mendoj se të gjitha sanksionet që na godasin më shumë se rusët nuk do të ishin të mira për ne. Kjo është arsyeja pse ne jemi kundër sanksioneve në naftë dhe gaz”, tha për CNBC Magnus Brunner, ministri federal i financave i Austrisë.

Zyra evropiane e statistikave vlerëson se Austria importoi pothuajse 59% të gazit të saj natyror nga Rusia gjatë vitit 2020. Bullgaria, Republika Çeke, Letonia dhe Hungaria importuan një pjesë edhe më të madhe të gazit natyror nga Rusia po atë vit, sipas Eurostat.

Një zëdhënës i Komisionit Evropian tha më herët të hënën se procesi i përgatitjes së sanksioneve të reja ishte “konfidencial”.

“Ne kurrë nuk komentojmë për proceset në vazhdim”, shtoi zëdhënësi.

Komisioni Evropian, krahu ekzekutiv i bllokut, përgatit propozime për sanksione në bisedimet me 27 kryeqytetet e BE-së dhe më pas u takon atyre vendeve që të miratojnë masat. Çdo sanksion i ri kërkon marrëveshje unanime.

N.Xh / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.