Celularët, AKEP kusht për kontratat – Me “font” jo më të vogël se 10, të shkruara qartë në jo më shumë se 3 faqe A4

Kontratat e kompanive celulare nuk do të kenë më anekse me shkronja të vogla e të palexueshme apo të mbi logo që I bëjnë vështirësisht të lexueshme. AKEP ka përcaktuar rregulla të reja për kontratat që do u jepen konsumatorëve nga kompanitë celulare.

Përmbledhja e kontratës, përveç rasteve të mirë argumentuara, nuk duhet të jetë më shumë se ekuivalenti i një faqe A4 kur printohet. Në rastet kur shërbimet apo shërbimet dhe pajisja fundore, që përmbajnë të paktën një shërbim të aksesit në internet ose shërbim publik telefonik të bazuar në numra, integrohen në një kontratë të vetme, përmbledhja e kontratës, përveç rasteve të mirë argumentuara, nuk duhet të jetë më shumë se ekuivalenti i tre faqeve A4 kur printohet.

Së dyti, Informacioni në përmbledhjen e kontratës duhet të paraqitet në sipas një rendi të paracaktuar. Lloji i fontit të përdorur duhet të jetë i tillë që teksti të jetë lehtësisht i lexueshëm. Madhësia e fontit duhet të jetë të paktën 10. Në raste të justifikuara madhësia e fontit mund të reduktohet; në të tilla raste duhet të ofrohet mundësia që përmbledhja e kontratës të zmadhohet me mjete elektronike ose me kërkesë të merret në format me madhësi teksti jo më pak se 10.

Përmbledhja e kontratës duhet të jetë lehtësisht e lexueshme me kontrast të mjaftueshëm midis font-it të përdorur dhe sfondit, sidomos në rastin e përdorimit të ngjyrave. Përdormi I objekteve vizuale, si simbole, ikona dhe grafike apo hiperlink apo pop-up, nuk duhet të mbivendoset në tekstin e përmbledhjes së kontratës.

“Përmbledhja e kontratës duhet të hartohet në gjuhë jo-teknike që është lehtësisht e lexueshme dhe kuptueshme për konsumatorët. Përmbledhja e kontratës duhet të fokusohet në informacion kyç që konsumatori ka nevojë për të krahasuar ofertat dhe të kryejë një vendimmarrje të informuar”, përcakton AKEP në rregulloren e re që pritet të hyjë në fuqi pas fazës së konsultimit publik.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.