Celulari në bregdet – AKEP: Nuk i pengojmë dot valët greke

Autoriteti i Komunikimeve Elektronike dhe Postare ka monitoruar cilësinë e shërbimit të operatorëve në zonat bregdetare turistike, kryesisht në jug të vendit. Sipas monitorimeve të kryera, ofrimi i shërbimit nga operatorët mobilë në plazhet e sipërcituara bazuar në matje ishte brenda kushteve të Rregullores mbi Cilësinë e Shërbimit me përjashtim të një pjese të izoluar mes Dhërmiut dhe Palasës.

Grupi i monitorimit të AKEP ka vërejtur se një arsye e ndërprerjes së shërbimit të telefonisë celulare në disa zona të caktuara është edhe mungesa e antenave nga operatorët shqiptarë dhe prania përballë e antenave të operatorëve grekë, duke bërë që shpeshherë të ndodhë kalimi automatikisht në roaming. AKEP sugjeron që përdoruesit të zgjedhin manualisht në sistemin e aparateve të tyre celularë operatorin me të cilin janë pajtimtarë.

Shqetësimi kryesor i pajtimtarëve ka qenë pikërisht fakti se në disa plazhe ka mungesë të valëve të telefonisë celulare të operatorëve shqiptarë dhe futjen automatikisht të valëve të operatorëve grekë. AKEP shpjegon se, për shkak të natyrës elektromagnetike të valës, është e pamundur të pengohet futja e valëve të operatorëve greke në territorin tonë.

Megjithatë, AKEP shprehet se është duke bashkërenduar punën për të krijuar një marrëveshje me rregullatorin e Greqisë për të ulur fuqinë e transmetimit sa të jetë e mundur, pa cënuar cilësinë e shërbimit.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.