Centralet e diellit dhe erës – Edhe 8 aplikime të reja pranë MIE, por pak përfitues nga masat mbështetëse të qeverisë
8 aplikime të reja kanë mbërritur pranë Ministrisë së Infrastrukturës dhe Energjisë për ndërtimin e centraleve të vegjël fotovoltaikë dhe eolikë. Referuar të dhënave, 7 prej aplikimeve janë bërë për ndërtimin e parqeve të prodhimit të energjisë nga era, ndërsa një prej tyre për shfrytëzimin e diellit si gjenerues energjie, teksa fuqia totale e parashikuar për t’u instaluar është 21 MW. Rreth një muaj një parë, edhe gjashtë aplikime të tjerë mbërritën pranë MIE për impiante diellore me fuqi të instaluar nga 2 MW, ndërkohë që interesi i investitorëve për këto projekte ka qenë i lartë.
Kjo pasi në vitin 2018, Këshilli i Ministrave miratoi masat mbështetëse për nxitjen e përdorimit të energjisë së prodhuar nga era e dielli, duke synuar arritjen e objektivit të përcaktuar në Planin Kombëtar të Veprimit për Burimet e Rinovueshme të Energjisë. Këto masa garantojnë kontrata për blerjen e energjisë elektrike të prodhuar, me një kohëzgjatje maksimale për 15 vjet, si dhe lidhjen dhe aksesin për përdorimin e rrjetit të transmetimit/shpërndarjes së energjisë së prodhuar.
Vendimi parashikon edhe një sërë masash të tjera lehtësuese, por shprehjet e interesit, që finalizohen me miratimet përfundimtare nga Ministria e Infrastrukturës dhe Energjisë janë të pakta. Sipas të dhënave zyrtare, gjatë vitit 2021 ky dikaster ka pranuar 17 aplikime për projektet e impianteve të vegjël të prodhimit të energjisë nga dielli, por ndërkohë asnjë prej tyre nuk ka marrë miratimin perfundimtar. Sa i takon impianteve eolikë, gjatë vitit të kaluar u dha vetëm 1 miratim përfundimtar.
Kjo ka sjellë, që numri i impianteve të vegjël të prodhimit të energjisë nga dielli të mbetet 11, teksa kapaciteti total i instaluar është 23 MË. Paralelisht, energjia eolike nuk është shfrytëzuar ende në vendin tonë, pasi asnjë impiant nuk ka hyrë në prodhim.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.