Certifikimi i guidave, MZHETTS: Të sigurojnë kredite dhe trajnime
Certifikimi i 159 guidave të para turistike ishte një proces fillestar, ku pjesë u bënë të gjithë ata që e ushtrojnë këtë profesion prej vitesh madje disa që nga vitet ’70. Në vazhdim të gjithë ata që do duan të certifikohen do të duhet të sigurojnë kreditet e nevojshme.
Elton Orozi, specialist në Ministrinë e Zhvillimit Ekonomik, Turizmit, Tregtisë dhe Sipërmarrjes jep edhe detajet në një intervistë për televizionin SCAN.
“Aplikuesit të sigurojnë kredite apo të vërtetojnë aftësinë e tyre nëpërmjet certifikimeve të veçanta për kategori nga më të ndryshmet, duke filluar që nga njohuritë mbi gjeografinë, njohuritë mbi diversitetin kulturor, mbi historinë e Shqipërisë, mbi antikitetin, mbi artin dhe arkitekturën, kohët moderne, apo gjeografinë humane. Të gjitha këto do të jenë pjesë e kurrikulave të veçanta që në vazhdimësi do të zhvillohen nga subjekte të specializuara dhe të njohura për dhënien e tyre”, thotë Orozi.
Guidat e certifikuara tashmë janë pjesë e një regjistri publik dhe është në përputhje me kuadrin ligjor për turizmin që synon reformimin e sektorit.
Nertila Maho/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.