Çfarë e dobësoi pushtetin e Merkelit?

Vendimi i Merkel për të mos kandiduar pas 18 vjetësh për një mandat tjetër në krye të partisë së saj Demokristiane (CDU) në dhjetor ka ‘tronditur’ Europën dhe valutën europiane, ndërsa ka ngritur njëkohësisht edhe shumë pikëpyetje se çfarë do të ndodhë më tej.

Kush do ta zëvendësojë Merkel?

Sipas Bloomberg, ka shumë të ngjarë që pas këtij lajmi të fillojnë “zjarret” brenda partisë për të mundur suksesin e Merkel si kancelare. Kandidatët e mundshëm për ta zëvendësuar atë si shefat e partisë përfshijnë, Annegret Kramp-Karrenbauer, Friedrich Merz ish-zyrtarin e partisë, ministrin e shëndetësisë Jens Spahn ,Ralph Brinkhaus si dhe Julia Klockner.

Vendimi do të lejojë që udhëheqësi i ardhshëm i partisë të krijojë një profil para zgjedhjeve të ardhshme kombëtare. Edhe në rastin e mundshëm që Merkel  të mbetet kancelare, me dikë tjetër që kryeson CDU, hapi i saj i parë drejt daljes shton rrezikun që partneri i saj i koalicionit SPD do të dalë nga koalicioni i Berlinit në fund të 2019 pas një rishikimi afatmesëm nga agjenda e qeverisë.

Çfarë do të ndodhë më pas?

Sipas Fortune, CDU / CSU ka të ngjarë të vazhdojë ta udhëheqë vendin edhe në ‘epokën’ pas Merkel. Ndërsa partia është zhytur ndjeshëm në sondazhe, ajo ende dominon sferën politike. Partia Social Demokratike e qendrës së majtë (SPD) më së fundi ka votuar në një nivel të ulët prej 16-18 për qind, pothuajse në mënyrë të barabartë me AfD-në e ekstremit të djathtë në disa sondazhe. Kështu, CDU / CSU mund të hiqej vetëm nga pushteti nëse do të formohej një koalicion shumë partiak – të tilla si një grup i Social Demokratëve, Partia e Majtë (Die Linke) dhe të Gjelbërit. Por këto grupe së bashku vetëm sondazhojnë rreth 40 për qind dhe përplasjet kryesore midis këtyre grupeve lidhur me çështjet e politikës së jashtme, e bëjnë koalicionin shumë të vështirë.

Në zgjedhjet e përgjithshme të vitit të kaluar Merkel pa një rënie në përkrahje dhe u detyrua të formonte një koalicion me socialdemokratët e qendrës së majtë pas një rezultati jon përfundimtar. Merkel pranoi në 15 tetor se votuesit kishin humbur besimin në qeveri dhe se ishte puna e saj për të “siguruar që besimi të fitohej” , tha CNN.

Në kulmin e saj, Merkel arriti të shtyjë pothuajse të gjitha forcat konservatore në skajet e partisë së saj. Por në vitet e fundit, konservatorët në CDU / CSU kishin filluar të shprehnin pakënaqësi lokale lidhur me qëndrimin e Merkelit. Me futjen e politikës së refugjatëve të Merkelit në vitin 2015, konservatorët në CDU / CSU filluan të humbin besimin në të.

Ai besim u humb krejtësisht në zgjedhjet e shtatorit 2017, kur CDU / CSU nxori në pah 33 për qind të votave dhe Alternativa më e djathtë për Gjermaninë (AfD) arriti një 13 për qind të fortë. Tani, CDU/CSU është në 28 për qind dhe sondazhet AfD në 16-18 për qind. Edhe pse në tre vitet që kur ajo mbajti të hapura dyert e Gjermanisë Politikat e Merkelit janë bërë shumë më konservatore, ajo vazhdon të flasë publikisht si një progresive. Kjo ka zemëruar një krah në rritje të CDU/CSU.

Synimet e Kancelares, ku mund ta shohim në të ardhmen?

Pavarësisht se njoftoi se do të heqë dorë nga drejtimi i partisë së saj të qendrës së djathtë të Bashkimit Kristian Demokrat (CDU) pas 18 vjetësh në këtë post, Merkel synon të mbajë mandatin e saj si kancelare, i cili zgjat deri në vitin 2021. Zëra qarkullojnë se me shumë mundësi Merkel do të kandidojë për kryesimin e Komisionit Europian.

e.t/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.