Çfarë eksportoi Shqipëria në Tetor? – Materialet e ndërtimit zgjerohen në tregjet e Italisë dhe Kosovës
Eksportet shqiptare gjatë muajit tetor panë një rritje prej mbi 3 miliardë lekësh, ose prej 14,2% krahasuar me një vit më parë, duke konfirmuar edhe një herë vrullin e ekonomisë shqiptare.
Tekstilet dhe këpucët, që janë dhe grupi më i madh i eksporteve, patën kontributin më të madh në këtë rritje, por një shtysë të madhe e kanë dhënë dhe grupmallra të tjerë.
Kështu, për muajin Tetor, grupi “Materiale ndërtimi dhe metale” ka raportuar një rritje prej 35%, ose 1.1 miliardë lekë më tepër. Tanimë ky grup renditet i dyti në eksportet shqiptare, duke i zënë vendin në podium grupeve si minerale e lëndët djegëse dhe ushqime, pije e duhan.
Faktor kryesor për këtë performancë pozitive duket se është zgjerimi i produkteve shqiptare në këtë kategori në tregjet e Italisë dhe Kosovës. Forcimi në këto dy shtete kompenson edhe uljen e lehtë të eksporteve drejt Greqisë.
Për periudhën Janar-Tetor, Italia importoi nga vendi ynë mallra me vlerë 13.3 miliardë lekë nga grupi “Materiale ndërtimi dhe metale”. Kjo përfaqëson një rritje të konsiderueshme me mbi 3 miliardë lekë. Po ashtu edhe Kosova rriti me 2.1 miliardë lekë importet nga Shqipëria për këtë kategori mallrash. Për 10 muajt e parë të vitit, fqinjët importuan mallra në vlerë 7.8 miliardë lekë.
Në vendin e tretë të grupmallrave të eksportuara gjendet grupi “Ushqime, pije dhe duhan”, i cili me 3.6 miliardë lekë, shënon një rritje të lehtë të eksporteve. Në po të njëjtën situatë raportohet edhe tregtia për konsum të jashtëm e mineraleve, lëndëve djegëse dhe energjisë. Për të dyja këto grupmallra, partnerë kryesorë të Shqipërisë mbeten Italia dhe Kosova.
Por në rastin e mineraleve, surprizojnë eksportet drejt Spanjës, të 4.5-fishuara në raport me një vit më parë. Tashmë Spanja është destinacioni kryesor për këto produkte shqiptare dhe për 10-mujorin raporton 9.3 miliardë lekë në vlerë mallrash.
Pothuajse të gjithë grupet e tjera shënuan rritje të eksporteve, me përjashtim të “Produkteve kimike dhe plastike”. Megjithatë, për këtë grup, ky duket thjesht një dobësim momental, pasi gjatë Janar-Tetorit ka rritje krahasuar me periudhën e mëparshme.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.