Çfarë fshihet pas bumit të turizmit në Turqi?
Duke thyer rekorde në sektorin e turizmit, Turqia po mban ritmin e saj për të arritur objektivat e saj të vitit 2023. Kombinimi i bukurisë natyrore, vendeve historike dhe kulturore, së bashku me gastronominë lokale, e bën Turqinë një nga destinacionet më të mira turistike në botë. Ashtu si vitet e kaluara, numri i turistëve në Turqi u rrit me 13.7% në 2019, duke arritur në 51.8 milion njerëz, duke vendosur një rekord të ri të gjitha kohërave.
Sipas Ali Bilir, Nënkryetarit të Shoqatës së Agjencive Turistike të Udhëtimit (TURSAB), Turqia e ka diversifikuar industrinë e saj të turizmit në një masë të madhe, duke shtuar site të reja në listën e destinacioneve të saja ndërsa po punon shumë drejt qëllimit për të arritur objektivin e pritjes së 75 milion turistëve deri në vitin 2023. Ai tha se skenari i sigurisë është përmirësuar në vitet e kaluara, gjë që ka tërhequr gjithnjë e më shumë njerëz dhe ka krijuar një perceptim pozitiv në mendjet e adhuruesve të udhëtimit.
Sipas të dhënave të fundit nga Instituti turk i Statistikave (TUIK), sektori i turizmit në Turqi vazhdon të përjetojë një prirje pozitive dhe, së bashku me rritjen e numrit të turistëve në hyrje, vendi ka të ngjarë të fitojë 34.5 miliardë dollarë vetëm nga industria e turizmit, duke shënuar një shifër historike në vend.
Për sa i përket rritjes, Ministria e Turizmit e Turqisë raporton se shumica e turistëve që vijnë janë nga Rusia me 7 milion njerëz që vizitojnë Turqinë në vitin 2019, e ndjekur nga Gjermania, me 5 milion vizitorë në të njëjtin vit. Bullgarët janë në vendin e tretë me 2.7 milion vizitorë, e ndjekur nga Mbretëria e Bashkuar dhe Irani.
Stambolli, kryeqyteti kulturor dhe historik i Turqisë dhe Antalia ishin në krye të destinacioneve më të vizituara. Të dyja këto qytete pritën gati 30 milion turistë vitin e kaluar. Tre nga pikat më nevralgjike të vendit ku edhe synohet të investohet më shumë janë:
Potenciali i shkëlqyeshëm për turizmin shëndetësor
Sipas Programit të Shndërrimit Shëndetësor, i cili filloi në vitin 2003, Turqia është bërë një nga vendet kryesore në botë në sektorin e kujdesit shëndetësor, kryesisht me banjat termale.
Zona bregdetare e Antalias
Antalia është bërë një markë e njohur në të gjithë botën vitet e fundit. Ajo ka më shumë se 1.700 atraksione dhe një kapacitet prej 600,000 shtretërish kur bëhet fjalë për akomodim.
Përpjekjet e qeverisë për të rritur të ardhurat
Ministri turk i Kulturës dhe Turizmit, Mehmet Nuri Ersoy njoftoi programin e ri vitin e kaluar për të përmbushur objektivin e turizmit të vitit 2023. Ministria nisi rregullore dhe strategji të reja për të rritur numrin e vizitorëve dhe të ardhurave nga turizmi. (trworld)
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.