Çfarë investimesh kërkojnë qytetarët? Sondazhi/ Infrastrukturë rrugore dhe ujë e kanalizime!
Qytetarët e Tiranës në 24 njësitë administrative më së shumti kërkojnë që buxheti i vitit 2020 të orientohen në përmirësimin e infrastrukturës rrugore, furnizimin me ujë dhe kanalizime.
Gjatë konsultimeve të buxhetit 2020, Bashkia e kryeqytetit ka zhvilluar një sondazh, qëllimi i të cilit ishte të evidentojë mendimin qytetar rreth fushave dhe zërave të investimeve.
Nga totali i 1.162 të intervistuarve pjesëmarrës në këtë sondazh, 42% e tyre ishin femra dhe 58 % meshkuj.
Ndërsa, grup-moshat 36-45 vjeç kanë përqindjen më të lartë të pjesëmarrjes, konkretisht 27 %. Nevojat dhe sugjerimet e ardhura nga qytetarët variojnë në funksion të zonave të banimit dhe problematikave të ndryshme që këto paraqesin, por përqindjen më të lartë e marrë në mesatare e zë infrastruktura rrugore dhe furnizimi me ujë dhe rrjeti i kanalizimeve.
Ndërsa, ndër kërkesat e tjera janë transporti public, çerdhet dhe kopshtet, punësim/formim profesional, pastrim/largim mbetjesh, parkimet, hapësira çlodhës/lulishte, kënde lojërash.
Ndërsa njësitë periferike, përpos kërkesës parësore për ndërhyrje në sistemin e kanalizimeve, kanë si kërkesë të domosdoshme transportin publik që bën lidhjen me kryeqytetin, ku jo për të gjitha zonat ka linjë urbane.
Në tërësi, në njësitë adminstrative urbane kërkesat janë të shumta për sistemim, asfaltim dhe ndriçim rrugësh, transport publik, ndërtim shkollash, kopshtesh dhe çerdhesh por edhe për punësim dhe nxitje të bizneseve si edhe më shumë vende parkimi.
Në njësitë administrative rurale kërkesat janë më të shumta për kanalizime, mirëmbajtjen e shkollave dhe kopshteve, përmirësimin e transportit apo largimin e mbetjeve në disa njësi.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.