Çfarë mallrash mori Shqipëria nga Turqia? Vetëm në mars, rritje me 4 miliardë lekë e importeve

Shqipëria ka njohur një rritje të fortë të importeve nga Turqia. Referuar të dhënave të tregtisë së jashtme  të publikuara nga Instat, rezulton se Shqipëria ka eksortuar në Turqi mallra me vlerë 450 milionë lekë në muajin mars të këtij viti.

Sa i përket importeve, shifra është shumë më e lartë. Në mars 2021, Shqipëria importoi nga Turqia mallra me vlerë 7.3 miliardë lekë, duke njohur një rritje me rreth 4 miliardë lekë në krahasim me marsin e vitit të kaluar.

Po ashtu, edhe në rang tremujori, importet me Turqinë kanë njohur rritje të konsiderueshme, rreth 17 miliardë lekë. Rritja në krahasim me periudhën janar-mars të vitit të kaluar është me 4.5 miliardë lekë më shumë.

Çfarë importuam nga Turqia?

Gjatë këtij viti, Shqipëria ka importuar 200 milionë lekë më shumë ushqime, pije e duhan, rreth 500 milionë lekë më shumë produkte kimike dhe plastike, 300 milionë lekë më shumë tekstile dhe këpucë.

Ndikimin më të madh e kanë grupmallrat “materiale ndërtimi dhe metale” ku këtë vit kemi importuar 1.7 miliardë lekë më shumë dhe makineri, pajisje e pjesë këmbimi ku kemi importuar rreth 700 milionë lekë më shumë.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.