Çfarë po mbarështojnë shqiptarët? Bie prodhimi i vezëve, mishit e qumështit por mjalti njeh vetëm rritje

Gjatë  vitit  2020  vihet  re  një tendencë në rënie e numrit të krerëve të blegtorisë. Referuar të dhënave të publikuara nga INSTAT, rezulton se në krahasim me vitin 2019, rënie ka pësuar numri i gjedhëve me rreth 12,8 %, numri i të leshtave me 11,4 % dhe numri i të dhirtave me 10,3 %.

Ndërkohë rritje ka shënuar numri i bletëve me rreth 24,3 % krahasuar me vitin 2019. Në vitin 2020 krahasuar me vitin 2019  rritje  ka  shënuar  prodhimi  i mjaltit me 11,7 %.

Në vitin 2020, në Shqipëri u prodhuan 4 mijë e 599 ton mjaltë, duke njohur një rritje me më shumë se 480 ton në krahasim me vitin 2019.

Ajo që konstaton Instat është se një vëmendje të veçantë po merr mbarështimi bletëve ku vërehet një zgjerim i aktivitetit të fermerëve në disa zona të vendit. Ky sektor gjatë vitit 2020, ka shënuar rritje me 24 % të numrit të koshereve krahasuar me një vit më parë.

Ndërsa rënie ka pësuar prodhimi i vezëve me 0,4 % dhe prodhimi i mishit peshë e gjallë me rreth 4,0 %. Prodhimi i qumështit, ka pësuar një  rënie  me  5,4  %  krahasuar  me vitin  2019  dhe  ndërkohë  struktura e  prodhimit  të  qumështit  është: qumësht lope 85,3 %, qumësht  dhie 7,6 % dhe qumësht dele 7,1 %.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.