Çfarë po ndodh në Britani pas rrëzimit të marrëveshjes për BREXIT? Skenaret, nga mocioni i mosbesimit, “Norway Plus” e referendumi i dytë

Parlamenti britanik rrëzoi marrëveshjen e BREXIT duke krijuar në këtë mënyrë trazira të mëtejshme në politikën britanike dhe europiane. 432 deputetë votuan kundër marrëveshjes dhe vetëm 202 pro saj. Kjo konsiderohet si një humbje shumë e thellë për qeverinë.

E mënjeherë për qeverinë e drejtuar nga Theresa May kanë nisur problemet. Lideri laburist Jeremy Corbyn prezantoi një mocion mosbesimi ndaj qeverisë që do të diskutohet sot duke krijuar kështu mundësinë e shkaktimit të zgjedhjeve të përgjithshme. Sipas Corbyn, çuarja e vendit në zgjedhje është veprimi më i mirë që mund të kryhet në këtë situatë.

Vetë kryeministrja May nuk ka në plan të japë dorëheqjen e madje është shprehur me besim se qeveria se saj nuk do të rrëzohet.

“Ilsole24ore” shkruan për 4 skenare të mundshme që mund të ndodhin në kushtet e rrëzimit të marrëveshjes që kryeministrja May kishte nënshkruar me Bashkimin Europian.

Skenari i parë është shtyrja e Brexit por deri në qershor, pasi në korrik Parlamenti Europian ka anëtarë të tjerë si rrjedhojë e zgjedhjeve. Një skenar tjetër është ai i ndjekjes së modelit “Norway Plus”, pra që me Britaninë të aplikohet modeli i Norvegjisë që edhe pse nuk është pjesë e Bashkimit Europian bën pjesë në zonën ekonomike europiane. Një opsion tjetër është një referendum i dytë që flitet prej më shumë se 1 viti. Kjo mundësi konsiderohet si shpresa e europeistëve britanikë por është përjashtuar nga kryeministrja May dhe lideri i opozitës Corbyn.

Skenari i katërt është ai i një qeverie laburiste që mund të vijë si rrjedhojë e mundësisë që qeveria aktuale të rrëzohet. Por kjo mundësi përjashtohet nga mediat.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.