Çfarë rruge do ndjekë Britania? – Anulimi i Brexit ka më shumë gjasa se dalja pa marrëveshje
Mundësia që Brexit të anulohet është më e lartë se dalja pa marrëveshje nga Bashkimi Europian, sipas një sondazhi të Reuters, që bëri gjithashtu të ditur se Banka e Anglisë pritet të vonojë rritjen e interesave. Bashkimi Europian vonoi javën e kaluar Brexit deri në muajin Tetor, duke shmangur rrezikun e daljes pa marrëveshje, që do të dëmtonte ekonominë britanike. Në sondazhin e fundit mujor të Reuters, probabiliteti q ë Britania të dalë nga Bashkimi Europian pa marrëveshje qëndronte në 0.15, që është niveli më i ulët që kur nisi sondazhi.
Vetëm një nga 51 të anketuarit dha një mundësi sipër 50%. “Pavarësisht se mundësia e daljes pa marrëveshje ka rënë, rrugëtimi është më i paqartë se kurrë”, u përgjigjën ekonomistët e BNP Paribas, në anketim. Shumica e ekonomistëve të anketuar thanë se alternativa kryesore është arritja e një marrëveshjeje tregtare. Vazhdimi i anëtarësisë në Zonën Ekonomike Europiane, që nënkupton pagesat në buxhetin europian për të mbajtur akses në tregun e përbashkët, rezultoi alternativa e dytë me më shumë gjasa.
Dalja pa marrëveshje nga Europa u kthye në alternativën me më pak gjasa, ndërsa anulimi i Brexit zuri vendin e tretë. Në lidhje me Bankën e Anglisë, asnjë prej ekonomistëve të anketuar nuk pret që institucioni të ndryshojë normën bazë të interesit në takimin e muajit të ardhshëm.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.