Cikloni i rrallë godet Greqinë / Shkëputje e energjisë në ishujt e detit Jon. Nuk ka patur dëme në njerëz
Greqia perëndimore ka raportuar dëme si pasojë e ciklonit të rrallë mesdhetar që goditi rajonin, por sipas Zv/Ministrit të Mbrojtjes Civile, Nikos Hardalias, nuk ka patur të plagosur. Ai tha se janë regjistruar shpëkutje të energjisë elektrike në ishujt e detit Jon të Zakinthos, Kefalonias dhe Itakës dhe ekipet lokale në bashkëpunim zjarrfikësit po bashkëpunojnë për të rikthyer rrjetin. Goditjen më të fortë e pësoi Itaka, Kefalonia, Zakynthos dhe Akaia perëndimore, me shpërthimet e erës që kaluan 80 km/h.
Reshjet më të mëdha të shiut u regjistruan në Itakë, në 86 mm, por për shkak të shkëputjes së energjisë, shumë qendra meteorologjike nuk regjistruan më të dhëna pas orës 4 të mëngjesit. Zjarrfikësit bënë të ditur se qytetarët kishin telefonuar për të raportuar rënie të pemëve dhe përmbytjen e disa shtëpive, por nuk ka patur deri më tani raportime të të dëmtuarve apo njerëzve të bllokuar. Në Itakë, një varkë lundruese u përplas në brigjet me shkëmbinj nga era e fortë, por 2 personat që ishin brenda dolën vetë në breg dhe ndodhen gjendje të mirë shëndetësore.
“Jemi në alarm”,- tha Hardailias, duke shtuar se 9 orët e ardhshme do të jenë kritike për zhvillimin e sistemit të ashpër të motit. Ai tha gjithashtu se njësitë rajonale të Magnesia, Arkadia dhe Fokida, do të ndikohen, ndërsa ditën e Shtunë, stuhia do të godasë Atikën dhe Evian.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.