Cilësia e furnizimit me energji – Caktohen kriteret që duhet të përmbushë OST, hapet rruga për kompensimin e klientëve
Enti Regullator i Energjisë ka miratuar nivelin e lejuar të kritereve standarde të cilësisë së shërbimit për furnizimin me energji elektrike, duke i hapur rrugë edhe kompensimit të klientëve në rast të mospërmbushjes së tyre nga ana e Operatorit të Sistemit të Transmetimit. Miratimi erdhi pas më shumë se 2 vite vonesash nga ana e OST-së, që nuk arrinte të propozonte në kohë nivelin e këtyre kritereve, që lidhen me kohën mesatare të ndërprerjes, energjinë e pafurnizuar, cilësinë e frekuencës si dhe periudhën e njoftimit të ndërprerjeve të planifikuara në sistemin e transmetimit.
Gjithashtu, te këta tregues përfshihet koha e nevojshme për t’u përgjigjur kërkesave për lidhje të reja, indeksi i kohëzgjatjes mesatare të ndërprerjeve, cilësia e tensionit dhe përqindja e ankesave për cilësinë e tensionit. Por, në mungesë të përcaktimit të këtyre kritereve ishte e pamundur të realizohej kompensimi i klientëve fundorë, në rast se standardet e sipërpërmendura nuk përmbushen. Sipas vendimit të ERE-s, koha mesatare e Ndërprerjes së Furnizimit me Energji Elektrike do të jetë 35 minuta, periudha e Njoftimit të Ndërprerjeve të Planifikuara në Sistemin e Transmetimit, 72 orë, ndërsa Koha e Nevojshme për t’ju Përgjigjur Kërkesave për Lidhje të Reja, brenda 60 ditëve.
Gjithashtu, në vendim përcaktohet se Indeksi i Kohëzgjatjes Mesatare të Ndërprerjeve do të jetë 104 minuta, ndërsa Përqindja e Ankesave për Cilësinë e Tensionit, 0%. Përcaktimi i këtyre treguesve është një detyrim që rrjedh nga Rregullorja për Cilësinë e Furnizimit dhe Performancën e Sigurisë të Rrejtit të Transmetimit, ndërkohë që është pikërisht OST, që ka detyrimin e Shërbimit Publik që të përmbushë standardet e cilësisë të furnizimit.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.