Çmime “tavan” për 4 produkte të shportës – Urdhër marketeve/ Sa duhet të shitet orizi, mielli, vaji dhe sheqeri!

Prej afro dy javësh, pikave të tregtimit me pakicë u ka shkuar një urdhër nga Ministria e Financave, i cili përcakton çmimet tavan për 4 produkte kryesore të shportës. Nga një vëzhgim i bërë me kamerën e Tv SCAN dhe informacioneve të marra nga manaxherët e marketeve, rezulton se këto njësi kanë si detyrim që të mos tejkalojnë çmimin tavan të shitjes të këtyre produkteve, i cili për vajin është përcaktuar 305 lekë/kg,  miellin e vendit 99 lekë për kg, orizin bazik kokërr gjatë 95 lekë për kg dhe sheqerin 99 lekë për kg.

Po ashtu është përcaktuar edhe çmimi për një thes miell 25 kg, i cili tregtohet që më shumë se 2150 lekë. Pikave të shitjes me pakicë u është vendosur gjithashtu një marzh fitimi mesatar prej 4 lekësh për produkt nga blerja me shumicë tek tregimi për konsumatorët në mënyrë që të mos lejohen abuzime. Pra çdo konsumator që blen produkte të shportës mbi këto çmime, duhet të dijë që është abuzim i pikave të shitjes.

Nga ana tjetër duket se këto njësi kanë mundësinë që të shesin edhe më lirë se tavani i përcaktuar produktet e shportës. Pasi nga vëzhgimi i bërë vihet re se disa supërmarkete tregtojnë produkte me çmime edhe më të lira.  Kështu në varësi të markave, çmimet e sheqerit fillojnë nga 95-99 lekë/kg, mielli nga 85-99 lekë për kg, orizi nga 95-179 lekë për kg, vaji nga 259-305 lekë/kg dhe makaronat nga 59-99 lekë për pako.

Për të mbajtur nën kontroll çmimet dhe për të mos lejuar abuzimet në treg me produktet e shportës Ministria e Financave ngriti Bordi i Transparencës për Çmimet Bazë, ku u përcaktuan tavane dhe marzhe fitimi për 4 produkte.

Elisabeta Dosku / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.