Çmimet e importit – Në rënie për të katërtin vit radhazi
Çmimet e produkteve industriale të importit janë ende në rënie. Të dhënat Instat treguan këtë javë se indeksi i çmimeve të importit ra me 0.8% në tremujorin e dytë të këtij viti. Për të katërtin vit radhazi, çmimet e importit po qëndrojnë në territor negativ, çka tregon për presione të dobëta inflacioniste nga jashtë. Rënia e çmimeve të importit fillimisht ka ardhur si rrjedhojë e çmimeve të ulëta të lëndëve të para dhe kërkesës ende të brishtë në tregjet botërore.
Megjithatë, në dy vitet e fundit kjo tendencë është theksuar edhe nga mbiçmimi i lekut në kursin e këmbimit valutor. Megjithëse me ritme më të ngadalta, leku ka vijuar të forcohet kundrejt euros dhe aktualisht shkalla e mbiçmimit të kursit është rreth 3% krahasuar me një vit më parë. Në ekonominë shqiptare, kjo është përcjellë në çmime ndjeshëm më të lira importi në produktet e degëve kryesore të ekonomisë. Rënia është më e thellë pikërisht në sektorin me peshën specifike më të lartë, industrinë përpunuese. Çmimet e importit në këtë industri për tremujorin e dytë ishin në rënie vjetore me 1.2%. Degët me rënien më të fortë ishin pijet, duhani dhe tekstilet.
Ndërkohë, në industrinë nxjerrëse çmimet e importit janë rritur lehtë, me 0.6% krahasuar me një vit më parë. I vetmi sektor me rritje domethënëse të çmimeve të importit ishte energjia elektrike, me afro 10% më shumë krahasuar me një vit më parë. Megjithatë, siç ka vënë në dukje Banka e Shqipërisë në një analizë të këtij viti, rritja e çmimeve të importit të energjisë nuk ka jep ndikime domethënëse në kostot e prodhimit në vend, për shkak se ky produkt shitet me çmime të rregulluara.
Ersuin Shehu / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.