Çmimet e naftës, të paqëndrueshme – Investitorët, në pritje të vendimeve të G7 për sanksione të reja ndaj Rusisë

Çmimet e naftës ranë të hënën në një seancë të paqëndrueshme teksa investitorët qëndruan në pritje për çdo lëvizje ndaj eksporteve të naftës dhe gazit rus, për të cilat pritet një vendim nga takim i udhëheqësve të vendeve të Grupit të Shtatë vendeve më të industrializuara (G7) në Gjermani.

Perspektiva e tkurrjes më shumë të ofertës u shfaq në treg, edhe pse liderët e G7 pritej të diskutonin gjithashtu një ringjallje të marrëveshjes bërthamore të Iranit, e cila mund të çonte në treg më shumë naftë.

Anëtarët e Organizatës së Vendeve Eksportuese të Naftës (OPEC) dhe aleatët e tyre, përfshirë Rusinë, të njohur si OPEC+, ka të ngjarë t’i përmbahen një plani për rritje të përshpejtuar të prodhimit të naftës në gusht, kur të takohen të enjten. Por, për momentin, shqetësimet e ofertës tejkalonin shqetësimet në rritje mbi potencialin për një recesion global pas një vargu të dhënash ekonomike të dobëta nga SHBA, konsumatori më i madh i naftës në botë.

Kontratat e së ardhmes së naftës së papërpunuar Brent ranë 8 cent në 113,04 dollarë për fuçi, ndërsa nafta e papërpunuar e Teksasit Perëndimor u tregtua me 107,38 dollarë për fuçi.

Udhëheqësit e G7, të cilët filluan takimin e tyre të dielën, pritet të diskutojnë opsionet për trajtimin e rritjes së çmimeve të energjisë dhe zëvendësimin e importeve të naftës dhe gazit rus, si dhe sanksione të mëtejshme që nuk përkeqësojnë inflacionin. Këto masa përfshijnë një kufi të mundshëm çmimi për eksportet ruse të naftës për të reduktuar të ardhurat e Moskës duke kufizuar dëmin për ekonomitë e tjera.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.