Çmimet e naftës zgjerojnë fitimet – Pritet rritja më e madhe tremujore që nga viti 2004

Çmimet e naftës vazhduan tendencën në rritje edhe gjatë sesionit të sotëm dhe pritet të realizojnë fitimet më të mëdha tremujore në 13 vitet e fundit.

Ditën e sotme, çmimet u mbështetën nga deklarata e ministrit iraken të naftës, i cili tha se OPEC dhe partnerët e tjerë që nuk janë pjesë e organizatës po konsiderojnë shtyrjen e afatit ose thellimin e shkurtimit të naftës, për të reduktuar mbifurnizimin e tregut.

Deri më tani, OPEC dhe vendet e tjera prodhuese, me në krye Rusinë, kanë rënë dakord të reduktojnë prodhimin me rreth 1.8 milionë fuçi në ditë, deri në mars të vitit 2018.

Disa vende dëshirojnë që afati të shtyhet edhe me tre muaj, deri në qershor të vitit të ardhshëm, ndërsa disa vende të tjera kërkojnë që afati të shtyhet deri në fund të vitit 2018.

Nafta Brent e Londrës po tregtohet në rreth 55.7 dollarë për fuçi, ndërsa nafta Bruto amerikan mbi 50 dollarë për fuçi. Ndërkohë, përgjatë tremujorit të tretë të këtij viti, dy bençmarkët kryesorë kanë fituar rreth 15.5% të vlerës, që është performanca më e mirë që nga tremujori i tretë i vitit 2004.

Analistët shprehet se, përmirësimi i ambientit ekonomik global do të rrisë kërkesën për naftë edhe për disa tremujorë.

Përsa i përket të dhënave në Shtetet e Bashkuara, rezervat e naftës bruto u rritën me 1.4 milionë fuçi, gjatë javës që u mbyll në 15 shtator, në 470.3 milionë fuçi. Analistët parashikonin një rritje të rezervave me 3.5 milionë fuçi.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.