Çmimet e prodhimit – Rriten nga lëndët e para dhe uji
Indeksi i çmimeve të prodhimit u rrit me 2.4% në tremujorin e dytë të këtij viti. Sipas Instat, rritja e çmimeve të prodhimit ngelet ende mjaft e luhatshme, por për këtë tremujor rritja ishte ndjeshëm më e lartë krahasuar me tremujorin e parë të vitit. Megjithatë, kjo rritje erdhi kryesisht nga segmenti i industrisë nxjerrëse dhe i çmimeve të administruara, ndërsa sektori më i rëndësishëm, ai industrisë përpunuese, vazhdon ketë çmime prodhimi në rënie.
Sipas Instat, rritja e çmimeve të prodhimit në vend edhe për tremujorin e dytë u udhëhoq nga industria nxjerrëse, me 17.5%, ndërsa specifikisht për sektorin e nxjerrjes së naftës rritja ishte 31% krahasuar me të njëjtën periudhë të një viti më parë. Edhe furnizimi me ujë regjistroi rritje me 2.5% të çmimeve krahasuar me një vit më parë.
Për sa i takon industrisë përpunuese, sektorit që mban edhe më shumë peshë në prodhim, edhe për tremujorin e dytë të vitit çmimet e prodhimit pësuan rënie, me 0.9%. Kjo rënie mund jetë ndikuar në një masë të madhe nga rënia e kostove të lëndëve të para për shkak të mbiçmimit të ndjeshëm të lekut në kursin e këmbimit valutor.
Në segmentin që prek më shumë konsumatorët, atë të industrisë ushqimore, indeksi i çmimeve të prodhimit ishte sërish negative me 2.7%, çka nënkupton çmime ende në rënie.
Që nga fundi i vitit 2016, indeksi i çmimeve të prodhimit është rikthyer në vlera pozitive, çka paralajmëron një rritje të ngadaltë të presioneve për inflacion më të lartë të çmimeve të konsumit. Indeksi i çmimeve të prodhimit mat çmimet me të cilin ato hidhen në treg nga prodhuesit, ndaj jep një orientim për rritjen e çmimeve të konsumit në një të ardhme të afërt. Nëse prodhuesit rrisin çmimet, me shumë të ngjarë, kjo rritje përcillet edhe në çmimet me të cilët konsumatorët i blejnë mallrat me pakicë.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.