Çmimet e prodhimit/ Thelluan rënien në tremujorin e tretë
Çmimet e prodhimit thelluan rënien në tremujorin e tretë të vitit. Sipas Instat, indeksi që i mat pësoi një rënie vjetore me 1.6%. Ndryshimi vjetor i çmimeve të prodhimit po qëndron në vlera negative gjatë gjithë vitit 2019, por në tremujorin e tretë pësoi rënien më të thellë prej më shumë se tre vitesh.
Thellimi i rënies së çmimeve të prodhimit mund të jetë një sinjal i mëtejshëm se kthimi i inflacionit në objektiv do të jetë edhe më i vështirë se ç’parashikohet.
Indeksi i çmimeve të prodhimit mat çmimet e produkteve vendase në hallkën e parë të tregtimit ose e thënë ndryshe çmimin me të cilin ato hidhen në treg nga prodhuesit. Ai është një tregues i rëndësishëm orientues për ecurinë e pritshme të çmimeve të konsumit. Rënia e çmimeve të prodhimit gjatë këtij viti ka qenë përgjithsisht në linjë edhe me uljen e ndjeshme të inflacionit.
Banka e Shqipërisë e ka shpjeguar këtë dobësim drastik të rritjes së çmimeve kryesisht me efektin e kursit të këmbimit. Mbiçmimi i lekut ndaj euros duket të ketë ulur kostot e industrisë përpunuese dhe, rrjedhimisht, edhe çmimet e prodhimit.
Megjithatë, në tremujorin e tretë një goditje edhe më fortë në rënie e dha industria nxjerrëse, ku çmimet e prodhimit pësuan rënie vjetore me 8.5%. Kjo mund të shpjegohet me konjukturën e çmimeve të naftës dhe të kromit.
Por, edhe industria përpunuese vijoi të regjistrojë ulje të çmimeve të prodhimit, 1.2% krahasuar me tremujorin e tretë të vitit 2018. Në segmentin që prek më shumë konsumatorët, atë të industrisë ushqimore, rënia e indeksit të çmimeve të prodhimit ishte 0.9%.
Banka e Shqipërisë parashikonte që efekti i lekut të fortë te çmimet në tregun vendas do të zbehej gradualisht në gjysmën e dytë të këtij viti. Të paktën deri në tremujorin e tretë, ky projeksion nuk është përmbushur dhe dobësia e çmimeve vazhdon, si në nivelin e prodhimit, ashtu edhe në atë të konsumit.
Rrjedhimisht, ulja e mëtejshme e normës bazë të interesit ngelet një opsion të tryezën e Bankës Qendrore, megjithëse ekspertët mendojnë se efektet e një uljeje të mëtejshme të normës bazë nga niveli aktual prej 1% do të ishin modeste.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.