Çmimet e shtëpive kanë rënë – E thotë Banka Qendrore e Austrisë, në Shqipëri më të ulëta se në 2010
Në raportin e fundit, atë të tremujorit të tretë të vitit me fokus integrimin Europian, Banka Qendrore e Austrisë analizon edhe tregun e shtëpive në vendet e Europës Qendrore dhe jug-lindore, mes të cilave edhe Shqipëria. mes 16 vendeve të këtij rajoni, Shqipëria klasifikohet në listën e atyre shteteve ku çmimet e shtëpive kanë rënë, ose janë rritur pranë zeros, që prej vitit 2010.
Këtë e sqaron qartë edhe grafiku, ku Shqipëria ilustrohet me ngjyrën e verdhë. Sipas këtij grafiku, aktualisht, çmimet e shtëpive në vendin tonë janë në pak më shumë se 90% e çmimeve të vitit 2010. Rënie më të madhe se ne gjatë këtyre viteve ka pësuar vetëm Serbia dhe Mali i Zi. Rritje e çmimit të shtëpive në vendin tonë vihet re vetëm në fund të 2012, si dhe në tremujorin e parë të vitit 2016. Pastaj në të gjithë hapësirën tjetër kohore, çmimet kanë qenë më të ulëta se në vitin 2010.
Të dhënat e Bankës Qendrore të Austrisë tregojnë gjithashtu se, thuajse të gjitha vendet e Ballkanit Perëndimor janë në të njëjtën listë me ne, me çmimet që janë rritur minimalisht ose kanë pësuar rënie. Kosova nuk është pjesë e raportit. Nga ana tjetër, në pjesën dërrmuese të vendeve të Europës Qendrore, çmimet e shtëpive gjatë këtyre 9 viteve janë rritur nga 20% deri në 80%, siç e tregon edhe grafiku.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.