Çmimet europiane të gazit rriten me 36% ndërsa sanksionet nxisin shqetësimet për mungesën e energjisë!

Gazi natyror europian u rrit pasi një raund tjetër sanksionesh ndaj Rusisë gjatë fundjavës nxiti shqetësimet për mungesën e energjisë. Futures kërcyen deri në 36% të hënën pasi vendet perëndimore ranë dakord të vendosnin ndëshkime më të forta pasi ato fillestare nuk arritën të bindin presidentin Vladimir Putin të tërhiqte forcat e tij nga Ukraina. Ndërsa përjashtojnë energjinë, sanksionet e reja mund t’i detyrojnë blerësit, financuesit dhe transportuesit të qëndrojnë larg flukseve ruse, ndërkohë që mbetet frika se Moska mund të hakmerret duke shkurtuar furnizimet.

Mund të pasojnë edhe kufizime më të rrepta. Europa mbështetet te Rusia për rreth një të tretën e gazit të saj, me shumë prej atyre dërgesave që rrjedhin përmes tubacioneve që kalojnë Ukrainën. Çdo ndërprerje mund të bëjë që Europa të ngrijë në dimër dhe të frenojë prodhimin e energjisë elektrike në kontinent, duke lënë industritë me energji intensive nga shkritoret e metaleve te prodhuesit e plehrave të ngadalësojnë ose mbyllin prodhimin.

Sipas sanksioneve të dakorduara, disa huadhënës rusë do të përjashtohen nga sistemi i mesazheve bankare SWIFT, i përdorur për transaksione me vlerë triliona dollarë në mbarë botën. Dënimet do të synojnë gjithashtu rezervat valutore të bankës qendrore. Disa banka tashmë po tërheqin financimin për tregtimin e mallrave, duke përfshirë naftën dhe metalet nga Rusia, një lëvizje që mund të turbullojë tregjet.

Blerësit europianë po kërkojnë të heqin dorë nga gazi rus duke ndërtuar terminale LNG dhe Gjermania ka ndaluar miratimet për një tubacion të diskutueshëm të quajtur Nord Stream 2. Por projektet e reja do të duhen vite për t’u ndërtuar. Për momentin, kontinenti mbetet thellësisht i varur nga Moska për energji, veçanërisht gaz, dhe çdo ndërprerje në rrjedhat mund të ngadalësojë rimbushjen e depozitave të varfëruara gjatë verës dhe

Rreziku i ndërprerjeve të furnizimit do të diskutohet nga ministrat e energjisë të Bashkimit Europian në një takim urgjent në Bruksel më vonë të hënën. Më vete, zyrtarët nga Kievi planifikojnë të takojnë homologët rusë edhe pse presidenti ukrainas Volodymyr Zelenskiy shprehu skepticizëm se bisedimet pranë kufirit me Bjellorusinë do të jepnin rezultate. Bloomberg

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.