Çmimet në Kosovë prekin “majat” – Në muajin prill, buka, vaji, qumështi dhe energjia me rritjen më të madhe!
Çmimet në Kosovë gjatë muajit prill kanë arritur një tjetër rekord në rritje. Të dhënat më të fundit të Agjencisë së Sttatistikave të Kosovës, tregojnë se inflacioni me bazë vjetore ka arritur në 11,2%.
Në këtë rritje kanë ndikuar kryesisht buka, vaji ushqimor, qumështi dhe energjia elektrike. Gjatë një viti, rritja e çmimit të vajrave dhe yndyrave ushqimore ishte më e madhja me 51.3 për qind, pasuar nga buka me 24.3 për qind.
Po ashtu, rritje të theksuar të çmimeve ka pasur edhe qumështi, djathi e vezët me 21.7 për qind dhe energjia elektrike me 17.6 për qind. Sipas Agjencisë së Statistikave, rritja e energjisë elektrike ka ardhur për shkak se në periudhën janar-maj 2021 ishte 0,0061 cent më e lirë sipas Ligjit për Rimëkëmbjen Ekonomike COVID-19.
Ndërkohë, në muajin prill 2022 ka pasur rënie të konsumit, përkatësisht të shpenzimeve me 7.3 për qind, gazit me 42.2 për qind, lëndët djegëse të ngurta, dru zjarri, pelet me 22 për qind, etj.
Agjencia e Statistikave thekson se Indeksi i Harmonizuar për Çmimet e Konsumit në muajin prill 2022 është rritur 1.5 për qind. Brenda një muaji, rritja më e madhe e çmimeve vërehet te vajrat dhe yndyrat ushqimore me 15.6 për qind, ndjekur nga gazi me 10.8 për qind dhe shërbimet e transportit me 3.9 për qind.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.