Çmimet në Shqipëri rriten njësoj me BE – Indeksi i Harmonizuar i Çmimeve të Konsumit në 1.3% gjatë shkurtit
Indeksi i harminizuar i Çmimeve të Konsumit, që mat luhatjet e çmimeve të konsumit mes vendeve të kontinentit të vjetër, tregon se gjatë shkurtit kjo normë në vendin tonë fiskohej në 1.3%. Edhe në Bashkimin Europian kjo normë fiksohet po në 1.3%, çka do të thotë se çmimet e konsumit në Shqipëri janë rritur me të njëjtin ritëm të unionit.
Krahasuar me vendet e tjera të unionit, Shqipëria rezulton e 11-ta. Rritja më e madhe e çmimeve, prej 2,4%, vihet re në grupin “Pije alkoolike dhe duhan”, pasuar nga grupet “Ushqime dhe pije joalkoolike” me 2.3 %, “Shëndeti” me 1,7 %, “Mobilim, pajisje shtëpie dhe mirëmbajtje” me 1,4 % “Transporti” me 1,1 %, “Komunikimi” dhe “Hotele, kafene dhe restorante” me 0,7% secili, “Mallra dhe shërbime të ndryshme” me 0,6 %,“Argëtim dhe kulturë” me 0,3 %. Nga ana tjetër çmimet e grupit “Veshje dhe këpucë” u ulën me 0,8%, pasuar nga grupi “Qira, ujë, lëndë djegëse dhe energji” me 0,3%. Në muajin shkurt 2021, ndryshimi mujor i matur nga Indeksi i Harmonizuar i Çmimeve të Konsumit është 1,4%.
Ky ndryshim është ndikuar kryesisht nga rritja e çmimeve të grupit “Ushqime dhe pije joalkoolike” me 3,5%, pasuar nga grupet “Pije alkoolike dhe duhan” me 0,5%, “Transporti” me 0,4 %, “Hotele, kafene dhe restorante” me 0,3 %, etj. Grupi “Argëtim dhe kulturë” shënoi një ulje me 0,5 %, pasuar nga grupi “Veshje dhe këpucë” me 0,4 % ulje.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.