Çmimet nuk lëvizin, pasiguri në tregje. Në pritje të të dhënave nga Kina
Çmimet e naftës janë regjistruar në luhatje minimale për të tretin sesion me radhë gjatë ditës së sotme. Investitorët janë të rrethuar nga pasiguria në një kohë që prodhuesit amerikan vijojnë të rrisin prodhimin ndërkohë që ata të OPEC së bashku me Rusinë po implementojnë strategjinë e shkurtimit të prodhimit.
Në çelje të sesionit të sotëm, Nafta Brent e Londrës kuotohej pranë nivelit të 55.92 dollarëve për fuçi, ndërsa ajo bruto amerikane pranë 53.14 dollarëve për fuçi.
Gjithsesi, çmimet kanë fituar disi terren në krahasim me çeljen e sesionit të djeshëm. Investitorët janë në pritje të të dhënave që do të publikohen më vonë gjatë javës sa i përket tregtisë së jashtme të Kinës, që është vendi i dytë më i madh konsumator në Botë i naftës, si dhe më i madhi importues.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.