Çmimet të “përgjumura” – Edhe viti 2018 nis me inflacion të ulët

Inflacioni e ka nisur me ritme të ngadalta vitin 2018. Sipas Institutit të Statistikave, për janarin inflacioni rezultoi 1.7%, me rënie të lehtë nga niveli 1.8% i dhjetorit. Ndërsa krahasuar me një vit më parë, inflacioni është ndjeshëm më i ulët.

Në janar të vitit të kaluar inflacioni kishte arritur në 2.8%, rritje që lidhej kryesisht me efektet e dimrit tejet të ftohtë në çmimet e produkteve ushqimore. Në një masë të madhe, goditja në rritje e inflacionit një vit më parë, bën që baza krahasuese për inflacionin e fillimit të këtij viti të jetë më e lartë se tendenca normale e çmimeve.

Rrjedhimisht, mund të pritet që gradualisht gjatë muajve të ardhshme, të kemi një korrektim në rritje, në përputhje me projeksionet e Bankës së Shqipërisë. Rritja e çmimeve të ushqimeve vazhdoi të zbehej edhe gjatë janarit, duke zbritur në 2.2%.

Mjafton të kujtojmë që një vit më parë inflacioni i grupit të ushqimeve kishte qenë 5.8%. Instat raporton se çmimet e mishit patën një rritje të dobët, ndërsa çmimet e zarzavateve dhe sheqerit pësuan madje rënie krahasuar me vitin e kaluar.

Ndërkohë, inflacioni i dobët i ushqimeve u kompensua pjesërisht nga një rritje më e lartë çmimesh në grupet “qira, ujë lëndë djegëse, energji”, pije alkoolike dhe duhan”, si edhe “veshje e këpucë”.

Pas mbledhjes së Këshillit Mbikëqyrës, ditën e mërkurë, Banka Qendrore u shpreh se kërkesa agregate ngelet ende e pamjaftueshme për të shfrytëzuar plotësisht kapacitetet prodhuese të ekonomisë dhe për të forcuar presionet inflacioniste.

Edhe inflacioni i importuar vazhdon të ngelet i dobët, shoqëruar edhe nga forcimi i lekut në kursin e këmbimit valutor.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.