Çmimi i energjisë – Çela: OSHEE nuk do të kërkojë rritje

Fundi i vitit sjell zakonisht edhe  ndryshimet në çmimin e energjisë elektrike, ku institucionet përgjegjëse i drejtohen ERE për këtë. Por edhe pse akoma nuk ka një vendim të prerë, Operatori i Shpërndarjes së Energjisë Elektrike duket se nuk do të kërkojë rritje të tarifës.

Në një konferencë për mediat, Administratori i OSHEE, Adrian Çela, tha se po kalkulohen të gjithë treguesit e korporatës dhe më pas do të merret një vendim.

“Jemi duke bërë llogaritjet përkatëse. Për sa kohë nuk kemi disa shifra që janë: tarifa e gjenerimit, sasia që do prodhojmë, nuk mund t’ju japë asnjë lloj përgjigje. Nuk ka asnjë lloj fokusimi apo asnjë llojë predispozicioni për rritje tarife. Jemi të orientuar të mos rrisim tarifën”, tha Çela.

Gjithashtu sipas Celës, kjo kompani në vitet e fundit ka ulur ndjeshëm humbjet në rrjet, të cilat aktualisht janë në nivelin 26 %. Gjatë  komunikimit me mediat, Administratori i OSHEE njoftoi dhe  platformën e punësimit online, ku vetëm në këtë kompani janë shpallur 11 vende vakante për drejtora rajonalë.

Violeta Shqalsi/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.