Confindustria, ankesa për e-albania/ Fontana: Gabimet e sistemit po penalizojnë biznesin. Të hapen sportelet e asistencës!

Aplikimet online nëpërmjet portalit e-albania, po i krijojnë biznesit vështirësi të panumërta. Kështu e ka cilësuar kreu i Shoqatës se Industrialistëve Italianë në Shqipëri, Sergio Fontana, këtë shërbim në një shkresë drejtuar Ministres së Financave, Delina Ibrahimaj.

Problemet e sistemit online shkaktojnë paqartësi te sipërmarrja, penalizojnë biznesin për gabime që s’varen prej tij dhe krijojnë kosto artificiale të paparashikuara dhe të padrejta për sipërmarrjen privates sipas kreut të confindustrias. Ndërsa, aplikimet online të regjistrimeve të detyrueshme hasin vështirësi. Bllokimi me orë të zgjatura i portalit e-albania ka penalizuar subjektet.

Fontana thotë se problematika shfaqen edhe te certifikatat e fiskalizimit, pasi portali jo gjithmonë dërgon e-maile automatike për ripërtëritjen e certificates. Në sistem nuk ekziston shërbimi për rezervimin e emrit. Dhe në rast se administratori është i huaj kërkon dhe pranon vetëm adresë shqiptare.

Shoqata e Industrialistëve Italianë në Shqipëri thekson se portali duhet të kishte kaluar përmes një periudhe prove derisa të kolaudohej teksa kërkon si zgjidhje mos aplikimin e gjobave dhe penalizimeve për vonesa të regjistrimit të të dhënave të detyrueshme për një afat 6-mujor,  AKSHI dhe QKB-ja të hapin sportelet e asistencës, në mënyrë që zgjidhjet të jenë më të shpejta, të shkurtohen afatet për pajisjen me certifikatë fiskale, të ofrohen të gjitha shërbimet dhe të drejtat që parashikon ligji për Regjistrimin e Biznesit.

Kalimi i shërbimeve online u vendos e detyrueshme nga qeveria që prej datës 1 maj 2022.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.