“Corriere” hedh tezën se ministri italian i Ekonomisë Giovanni Tria mund të japë dorëheqjen! Arsyet
Negociatat që Italia po bën me Bashkimin Europian për planin e shpenzimeve kanë krijuar tensione jo vetëm mes negociatorëve të dy palëve por edhe përbrenda qeverisë italiane, duke rrezikuar të prodhojnë edhe dorëheqje të niveleve të larta. “Corriere” shkruan se Giovanni Tria, “ministri teknik” i Ekonomisë në një qeveri politike po tundohet nga dorëheqja më shumë se asnjëherë, që prej kohës kur u ftua në mënyrë të papritur për t’u bërë pjesë e kabinetit qeveritar italian.
Sipas të përditshmes italiane, ai mund ta japë dorëheqjen kur ligji i buxhetit të miratohet nga parlamenti gjatë këtyre javëve.
Gazeta sjell dëshmi të bashkëpunëtorëve të tij që shprehen se ai është “i lodhur fizikisht e mendërisht” por mbi të gjitha “ i ka ardhur në majë të hundës me goditjet që i bëhen besueshmërisë së figurës së tij nga ana e qeverisë. Në artikull sillet në vëmendje deklarata e pak ditëve më parë e dy drejtuesve politike të qeverisë, Salvini dhe Di Maio që shprehen besimin e plotë te kryeministri Conte, në negociatat që po bëhen me Brukselin, duke lënë terësisht jashtë vëmendjes negociatorin real, ministrin Tria.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.