Covid-19 “fryn” borxhin korporativ. Firmat do shtojnë 1 trilion dollarë borxh të ri në 2020, për të mbijetuar

Kompanitë në të gjithë botën do të pësojnë një rritje të borxhit të ri prej thuajse 1 trilionë dollarë në vitin 2020, ndërkohë që përpiqen të mbrojnë financat nga pandemia, sipas një raporti të 900 firmave të mëdha.  Kjo do të përkthehet në një rritje të borxhit korporativ në të gjithë botën prej 12%, në rreth 9.3 trilionë dollarë,  duke bërë që firmat me barrën më të madh të borxhit të kenë detyrime sa një vend sovran.

Viti i kaluar regjistroi gjithashtu një rritje prej 8%, nxitur nga blerjet dhe shkrirjet mes kompanive, si dhe nga firmat që kanë marrë hua për të financuar riblerejt e aksioneve dhe pagesat e dividentëve.  Megjithatë,  rritja e këtij viti do të jetë totalisht ndryshe, pasi firmat po përpiqen të mbijetojnë nga koronavirusi. Janus Henderson, firma që ka hartuar analizën, deklaroi se kompanitë i janë drejtuar tregjeve të borxhit për 384 miliardë dollarë mes Janarit dhe Majit.

Tregjet e huadhënies kanë qendruar të mbyllura përveç se për firmat ëm të besuara në muajin Mars, por janë rihapur përsëri prej programeve të blerjes emergjencë të borxhit nga bankat qendrore, si Rezerva Federale, Banka Qendrore Europiane dhe Banka e japonisë.  Kompanitë e përfshira në studim kanë një nivel të borxhit thuajse 40% sipër nivelit të 2014-s dhe rritja e borxhit ka tejkaluar lehtë rritjen e fitimeve. Fitimet përpara taksave për të njejtin grup të 900 kompanive janë rritur me 9.1% në 2.3 trilionë dollarë. Kompanitë amerikane mbajnë thuajse gjysmën e borxhit botëror korporativ në 3.9 trilionë dollarë dhe kanë patur rritjen më të shpejtë në 5 vitet e fundit krahasuar me çdo ekonomi të madhe.

Gjermania mban vendin e dytë, me 762 miliardë dollarë dhe ka 3 kompanitë me barrën më të madhe të borxhit në botë, si Volksëagen, me 192 miliardë dollarë borxh që afrohet me vende si Afrika e Jugut dhe Hungaria.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.