Covid-19 “gjunjëzon” ekonominë kineze/ Ngadalësimi më i madh i fabrikave në histori, ekonomia drejt kontraktimit në T1
Indeksi PMI i Markit për Kinën në manifakturë por edhe sektorët jo-prodhues rezultoi në 35.7 pikë dhe 29.6 pikë respektivisht gjatë muajit shkurt, në rënie me 14.3 dhe 24.5 pikë nga muaji paraardhës, thonë të dhënat e byrosë kombëtare të statistikave. Niveli i 50 pikëve ndan rritjen nga kontraktimi.
Të dhënat tregojnë se impakti i Covid-19 në ekonominë kineze, dhe në atë botërore si rrjedhojë, është mjaft i madh. Shpërthimi i covid-19 ka rrëzuar në tokë kërkesën, ndërkohë që nga ana tjetër, shumë fabirka kanë pezulluar punën.
Ngadalësimi i aktivitetit të fabrikave në Kinë gjatë shkurtit rezulton të jetë më i rëndi në të gjithë historinë, e madje edhe më i madh se ai i krizës financiare globale të vitit 2008.
Të dhënat rezultojnë gjithashtu shumë më poshtë se pritshmëritë e tregjeve dhe analistëve, gjë që do të ketë rrjedhimisht ndikim në tregje, duke filluar prej ditës së Hënë.
Leximi i këtyre të dhënave është panorama e parë e gjendjes së ekonomisë kineze pas shpërthimit të epidemisë.
Të gjitha parashikimet thonë se, ekonomia kineze do të kontraktohet gjatë tremujorit të parë të vitit, për të parën herë që prej fillim- viteve 90-të.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.