Covid-19 kalon 20 mln në Europën Lindore – Rajoni përballet me rritjen më të shpejtë që kur nisi pandemia
Numri i rasteve me Covid deri më tani në Europën Lindore ka kaluar 20 milionë, ndërkohë që rajoni po përballet me vatrat më të këqija që kur nisi pandemia dhe fushatat e vaksinimit janë ngadalësuar. Shtetet në rajon kanë normat më të ulëta të vaksinimit në Europë, me më pak se gjysmën e popullsisë që ka marrë një dozë të vetme. Hungaria kryeson me vaksinimin në rajon, me 62% të popullsisë që ka marrë të paktën 1 dozë, ndërsa Ukraina i ka ofruar vetëm 19% të banorëve një dozë të vetme, sipas të dhënave të përllogaritura nga Reuters.
Infeksionet e reja në rajon janë rritur në mënyrë të vazhdueshme dhe tashmë qëndrojnë në një mesatare prej 83,700 raste të reja në ditë, që është niveli më i lartë që prej Nëntorit të kaluar. Edhe pse ka vetëm 4% të popullsisë botërore, Europa Lindore përbën për 20% të rasteve të reja të raportuara në botë.
Sipas Retuers, 3 nga 5 vendet që po raportojnë më shumë vdekje në botë janë në Europën Lindore; Rusia, Ukraina dhe Rumania. Drejtori i emergjencave tek Organizata Botërore e Shëndetësisë, Mike Ryan, tha se mbledhjet në ambiente të brendshme pas heqjes së masave të karantinës, sidomos tashmë që po afron dimri, kanë nxitur rritjen e infeksioneve në shumë vende në Europë. Ndërkohë që vala e infeksioneve po intensifikohet, shumë njerëz në Europën Lindore janë ndarë mes sfidës dhe pendimit për që nuk janë vaksinuar.
Një sondazh i Komisionit Europian, Eurobarometri, tregoi se të paktën 1 në 3 persona në shumicën e vendeve të lindjes, nuk beson tek sistemi shëndetësorë, krahasuar me mesataren prej 18% në BE. Mbi 40% të rasteve të reja të raportuara në lindje ishin në Rusi, me 120 njerëz pozitiv në çdo 5 minuta. Sllovakia raportoi 3,480 raste të reja më 19 Tetor, që ishte shifra më e madhe që prej Marsit, ndërkohë që vendi ka një nga normat më të ulëta të vaksinimit në BE.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.