COVID-19, Rama-Basha replika në distancë/ Rama ‘prezanton’ Komitetin e Ekspertëve. Basha: Ke humbur kontrollin mbi pandeminë
Kryeministri Edi Rama dhe kreu i Partisë Demokratike Lulzim Basha kanë shkëmbyer replika në distancë në lidhje me menaxhimin e situatës së krijuar nga COVID-19.Fillimisht, kryeministri i ktheu përgjigje kryedemokratit për akuzat e bëra ndaj Komitetit Teknik të Ekspertëve mbi mungesën e profesionalizmit të tyre. të Përmes një videoje të publikuar në rrjete sociale, përshkruheshin specializimet dhe eksperienca e profesorëve që sipas Ramës përcaktojnë strategjinë e gjurmimit të COVID-19 dhe udhëzojnë qeverive në çdo hap për masat e nevojshme kundër armikut të padukshëm. Por, kryedemokrati nuk ka nguruar të akuzojë sërish qeverinë se ka humbur çdo kontroll mbi pandeminë. Përmes një postimi në rrjete sociale Basha theksoi se Shqipëria ka numrin më të ulët të testimeve dhe mjekëve në Evropë.
“Rama ka humbur çdo kontroll mbi pandeminë. Kemi testimet më të ulëta në Europë, numrin më të ulët të mjekëve dhe spitalet në kolaps vetëm sepse ai nuk heq dorë nga vjedhja me inceneratorë e koncesione.Pasi shkatërroi ekonominë tani ai po shkatërron jetën dhe shëndetin e njerëzve.” – shkruan Basha.
Numri i të prekutve me COVID-19 ka patur një tendencë në rritje gjatë 3 javëve të fundit, ndërkohë që së fundmi Komiteti Teknik i Ekspertëve ndaloi kthimin e studentëve në auditore, si një masë për të frenuar përhapjen e virusit. Gjithashtu, është paralajmëruar mbyllja e lokaleve, që ndodhen në zonën e ish-Bllokut.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.