Covid-19, rimbursim për trajtimin në shtëpi. Shifrat/ Sa do të jenë pagat e mjekëve dhe infermierëve nga Janari 2021
Ministria e Shëndetësisë po shikon mundësinë e rimbursimit të shpenzimeve të kurimit për qytetarët e prekur nga infeksioni COVID-19 dhe që trajtohen në kushte shtëpie. Shqetësimi është ngritur nga deputetët e Komisionit të Ekonomisë, lidhur me koston e lartë që ka ky trajtim dhe pamundësinë e qytetarëve për ta përballuar.
“Rrotullohet diku tek 4 mln lekë të vjetra, dhe më poshtë nuk ka. Pyetja ime është, ne i paguajmë sigurimet shëndetësore edhe në kohë COVID, përse nuk rimbursohen këto ose një pjesë e tyre që janë bazike” – u shpreh Artur Roshi, Deputet i Opozitës Parlamentare. E menjëhershme ishte përgjigja edhe nga Geraldina Prodani, Sekretare e Përgjithshme e Ministrisë së Shëndetësisë:
“Sa i përket paketës së rimbursimit të ilaçeve jemi duke e vlerësuar. Paketat e kurimit për skenarin kur është në shtëpi dhe me skenarin për një trajtim më të thjeshtë dhe të moderuar. Jemi akoma duke diskutuar dhe gjetur mundësinë e rimbursimit. Është akoma një projekt.”
Nga ana tjetër gjatë prezantimit të buxhetit të Ministrisë së Shëndetësisë, Sekretarja e Përgjithshme, Geraldina Prodani, bëri me dije se sa do të jenë pagat mesatare të personelit shëndetësor pas rritjes prej 40 për qind që do të përfitojnë nga Janari i viti të ardhshëm.
“Sipas këtij skenari paga mesatare e mjekëve në spital do të jetë 1115 euro nga 715 që është aktualisht. Mesatarja e mjekëve në qendër shëndetësore do të jetë 918 euro nga 656 euro që ishte. Paga mesatare e infermierëve në spitale do të jetë 714 euro nga 439 euro që është tani. Ndërkohë paga mesatare e infermierëve ën qendra shëndetësore do të jetë 504 euro nga 360 euro që është tani.”
Nga buxheti total i Ministrisë së Shëndetësisë për vitin e ardhshëm, prej afro 68 miliardë lekësh, 3.5 miliardë lekë do të shkojnë për investime në këtë sektor, nga të cilat 31 për qind janë projekte të reja për 2021-shin, ndërsa pjesa tjetër projekte në vazhdim.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.