“Covid do bëhet i manaxhueshëm” – BioNTech: Virusi do qëndrojë për disa vite, jemi gati ndaj varianteve
Bashkëthemeluesja dhe shefja mjekësore e Biontech, Ozlem Tureci, tha se bota nuk duhet të jetojë në frikë nga virusi, pasi Covid do bëhet i manaxhueshëm. Megjithatë, shefja e BioNtech, firmës gjermane që ka zhvilluar vaksinën e Covid me Pfizer, shtoi se do të duhet përshtatja me një normalitet të ri, pasi virusi do qëndrojë për disa vite. Ndërsa pyetej mbi shqetësimet ndaj varainteve të reja të koronavirusit, ajo tha se BioNTech vlerëson vazhdimisht mutacionet e mundshme në të ardhmen dhe se do të ketë të tjera.
“Për të gjithë variantet që ndodhen në qarkullim, duket se vetëm dozat e treta nxitëse, që kthejnë rënien e imunitetet përsëri në nivele të larta, janë të mjaftueshme”- tha ajo. Megjithatë, pritet që të shfaqen variante të reja, që mund të anashkalojnë përsëri mbrojtjen. “Për këtë arsye, ne kemi një strategji tjetër ku përgatitemi shpejtë për t’u përshtatur me një variant të ri, dhe po i bëjmë këto prova së bashku me rregullatorët”- tha Ozlem Tureci.
Ajo ka bashkëthemeluar firmën gjermane BioNtech në vitin 2008 së bashku me bashkëshortin e saj, ekzekutivin Ugur Sahin. Tureci tha se më shumë të dhëna do të duhen për të patur një rrugëtim jashtë pandemisë, por ajo parashikon se dozat nxitëse mund të jepen çdo 12 apo 18 muaj.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.