Credins Bank, kontribut për Tiranën – Korkuti: Credins, në shërbim të komunitetit, Veliaj: Shtojmë gjelbërimin
Credins Bank i përgjigjet pozitivisht thirrjes së Bashkisë së Tiranës, për të kontribuar në shtimin e hapësirave të gjelbra në kryeqytet. Kryebashkiaku, Erjon Veliaj dhe Drejtori i Përgjithshëm i Credins Bank, Maltin Korkuti, kanë marrë pjesë në mbjelljen e 150 pemëve, në zbatim të projektit “Pylli Orbital”, në parkun e Liqenit. Drejtori i Përgjithshëm i Credins Bank, Maltin Korkuti, tha se është detyrim i gjithsecilit të japë kontributin e vet në projekte, në të mirë të komunitetit. Por jo vetëm kaq, Credins Bank do të vijojë angazhimin edhe në projekte të tjera në shërbim të komuniteteve.
““Me ftesë të bashkisë, sot jemi këtu në këtë projekt shumë interesant për mjedisin e qytetit tonë. Banka Credins sot është prezente me 23 filiale në qytetin e Tiranës dhe është mëse normale që të japim kontributin tonë në projekte të tilla të ngjashme. Jemi të angazhuar që edhe në vazhdimësi të jemi pjesë e këtyre projekteve që përmirësojnë cilësinë e jetesës në qytetin tonë.”
Veliaj tha se, mbjellja ndodh në një zonë që pak kohë më parë ishte një djerrinë, megjithatë projekti në përiudhë afatshkurtër synon gjelbërimin e pjesës jugore të unazës për të mbërritur deri në Liqenin e Farkës.
“Më vjen mirë që me këto 150 pemë, një djerrinë dhe një pikë inertesh, një pikë toksinash dhe të gjithë helmet e kësaj lagjeje në fakt po gjelbërojmë sot pasi kemi rehabilituar terrenin do të vazhdojmë me këtë gjurmë derisa të shkojmë në zonën e Lundrës ku ne takohemi pastaj me Liqenin e Farkës. Nëse do të vazhdojmë me këtë frymë, ashtu siç banka na ndihmon sot, ashtu si kompani të tjera janë përfshirë, deri tani mbi 20 kompani, do të donim që të vazhdonim gjatë gjithë këtij vit. Besoj për këdo që ka kontribut social ose njeh përgjegjshmërinë sociale të korporatave, unë nuk besoj se ka një investim më të madh sesa mbjellja e pemëve. Këto pemë do të jenë këtu, kur njerëzit do ti jenë mirënjohës bankës apo bashkisë, apo punëtorëve, apo atyre që na mundësuan terrenin në jetë të jetëve.”
Drejtori i Përgjithshëm i Agjencisë së Parqeve dhe Rekreacionit, Blendi Gonxhe, tha se në vetëm një vit janë mbjellë 3 mijë pemë, por projekti do të vijojë për shtimin e hapësirave të gjelbra në Tiranë.
Arbër Hitaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.