Credins në rritje me 10% – Totali i aktiveve arrin në 1.53 miliardë euro
Credins Bank ka vazhduar të rritet edhe në tremujorin e tretë të vitit. Sipas treguesve financiarë të publikuar nga vetë banka, në fund të muajit shtator totali i aktiveve arriti në vlerën e afro 191 miliardë lekëve ose rreth 1.53 miliardë euro. Me bazë vjetore, aktivet e Credins janë rritur me afro 10%, duke mbajtur kështu ritme të rritjes ndjeshëm më të larta krahasuar me mesataren e sektorit bankar.
Credins është aktualisht banka e tretë më e madhe për nga totali e aktiveve dhe e dyta për nga vlera e portofolit të kredisë.
Pas një rritjeje të shpejtë në vitet e mëparshme, portofoli i kredisë gjatë këtij viti është stabilizuar pranë vlerës së rreth 97 miliardë lekëve. Rritja e bankës këtë vit po mbështetet kryesisht te instrumentet me rrezik të ulët, si letrat me vlerë të borxhit apo vendosjet në formë depozitash në institucione të tjera financiare. Këta dy zëra në bilanc janë rritur secili me rreth 70% krahasuar me një vit më parë.
Depozitat e klientëve janë rritur me afro 10% krahasuar me një vit më parë. Në fund të shtatorit, ato kishin vlerën e 162 miliardë lekëve ose rreth 1.3 miliardë euro. Rezultati financiar i bankës për 9-mujorin rezultoi pozitiv, me një fitim neto në vlerën e 164 milionë lekëve.
Ersuin Shehu/SCAN
Burimi: Credins Bank
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.