“Daily Mail”: Shqiptarët në burgjet tona janë trefishuar, na kushton 53 mln paund! Deputeti: Mekanizëm që t’i kthejmë në Shqipëri
Gazeta britanike “ Daily Mail” i ka kushtuar një artikull situatës së burgjeve, duke vënë theksin se është trefishuar numri i shqiptarëve në burgjet britanike. Duke iu referuar shifrave të ministrisë së Drejtësisë, gazeta shkruan se pas hekurave janë 726 shkelës ligji nga Ballkani nga 267 që ishin në vitin 2013.
“Shumë prej tyre dënohen për vrasje, drogë, ngacmime seksuale, pastrim parash si dhe kontrabandë njerëzish apo kërcënime me vdekje” shkruhet në artikull. Shqiptarët, sipas gazetës, tashmë përbëjnë grupin e tretë më të madh të të huajve të burgosur në Angli dhe Uells, pas kriminelëve irlandezë dhe polakë. E kjo, ka një kosto prej 53 milionë paundësh për tatimpaguesit britanikë.
Agjencia Kombëtare e Krimit (NCA) ka paralajmëruar se bandat e tregtarëve shqiptarë të drogës tani janë ‘një kërcënim i rëndësishëm’, duke përdorur taktika gjithnjë e më të pamëshirshme për të mbrojtur biznesin e tyre.
“Është e rëndësishme që qeveria të gjejë një mekanizëm për të siguruar që shqiptarët t’i kryejnë dënimet e tyre në Shqipëri. Në këtë kohë ku burgjet janë të mbipopulluara është e domosdoshme që ata të largohen sa më shpejt”, shprehet Deputeti i Punës David Hanson.
Në vitin 2016, policia arrestoi shqiptarët 2,781 herë, rreth 8 për qind më shumë se në 2015. Ai sugjeron se një në 11 nga 32,000 banorët shqiptarë të lindur në Angli dhe Uells u arrestuan, edhe pse disa mund të ishin marrë në paraburgim më shumë se një herë.
Por mijëra shqiptarë të lejuar në Mbretërinë e Bashkuar dyshohen për adoptimin e identitetit fals nga Kosova fqinje, duke pretenduar persekutimin gjatë konfliktit rajonal 18 vite më parë. Këta persona dyshohen të jenë në frontin e drogave dhe rrjeteve të prostitucionit.
“Shtetasit e huaj që abuzojnë me mikpritjen tonë duke kryer krime në Mbretërinë e Bashkuar nuk duhet të kenë asnjë dyshim në vendosmërinë tonë për t’i dëbuar ata”, shprehet një zëdhënës i Zyrës së Shtëpisë.
“Ne kemi larguar më shumë se 40,000 shkelës të huaj që nga viti 2010, duke përfshirë 6,346 në 2016-2017 – numri më i madh në rekord”.
Daily Mail/Përshtati në shqip: V.H/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.