Dalja pa marrëveshje nga BE – Carney: Disa industri nuk do të bëheshin të paqëndrueshme
Guvernatori i Bankës së Anglisë, Mark Carney tha se disa industri të mëdha do të bëhen të paqëndrueshme nëse Britania del nga Bashkimi Europian pa një marrëveshje.
Kryeministri i ri Boris Johnson ka thënë se do nxjerrë Britaninë më datë 31 Tetor, qoftë edhe pa marrëveshje të tranzicionit, ç’ka ka rritur shanset e “hard Brexit”. Një ditë pasi Banka e Anglisë uli projeksionet për ekonominë, Carney tha se shanset e daljes pa marrëveshje janë rritur ndjeshëm së fundmi. “Dalja pa marrëveshje do të bëjë që tregtia drejt eruopës të ndryshojë rrënjësisht”, tha Carney.
Guvernatori shtoi se industri si makinat, transporti, ushqimi dhe kimikatet do të përballen me sfidat më të mëdha. Mbështetësit e Brexit thonë se Carney është më pesimist se ç’duhet për të ardhmen e Britanisë jashtë Bashkimit Europian. Ish lideri i partisë konservatore Iain Duncan Smith tha se Carney është një nga arkitektët e “projektit të panikut”, diçka që guvernatori e mohoi. “Largimi nga marrëdhënia më e integruar ekonomike në botë, që është anëtarësimi në BE, në një marrëdhënie të re që do të varet nën rregullat e Organizatës Botërore Tregtare, do të ketë patjetër ndikim në ekonomi”, tha Carney.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.