“DASH” ankohet për PPP – “Ngushtojnë hapësirat për investime të huaja, janë të pamenduara”
Risia e Departamentit Amerikan të Shtetit në raportin e 2018-ës për klimën e investimeve në vendin tonë, në krahasim me një vit më parë, mbetet kritika për kontratat e Partneritetit Publik Privat.
Në raportin e këtij viti për herë të parë, qeveria amerikane ngre shqetësimin në lidhje me to, duke thënë qartë se, këto lloj kontratash ngushtojnë hapësirat për konkurrencë, përfshirë investitorët e huaj.
Madje Departamenti Amerikan i Shtetit specifikon faktin se, pengesat kryesore për investitorët e huaj në vendin tonë, rrjedhojë e konkurrencës së PPP-ve, janë në sektorin e infrastrukturës.
“Analizat e dobëta kosto-përfitim dhe mungesa e ekspertizës teknike në përgatitjen por edhe monitorimin e projekteve të Partneritetit Publik Privat janë shqetësime të vazhdueshme. Qeveria ka nënshkruar më shumë se 200 kontrata të tilla”, thuhet mes rreshtave të raportit.
Ky është raporti i radhës në serinë e atyre nga organizmat e huaja që kritikojnë qeverinë për mënyrën e menaxhimit të këtyre lloj kontratave, por i pari në llojin e tij nga qeveria amerikane.
Raportin e Departamentin Amerikan të Shtetit për klimën e investimeve e ka komentuar edhe kreu i opozitës.
“Raporti ka nota negative për çdo aspekt të klimës së biznesit dhe qeverisjes, por fakti më i rëndë që dëshmon nivelin Kriminal të qeverisë Rama në ekonomi është pohimi se investitorëve të huaj Edi Rama u bën shantazh të bashkëpunojnë me klientët e tij ose përndryshe nuk kanë shans të investojnë”, thotë Basha.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.