DASH për Shqipërinë – “Korrupsioni po sfidon reformën në drejtësi”

Departamenti Amerikan i Shtetit analizon edhe Shqipërinë në “raportin ndërkombëtar për strategjinë e kontrollit të narkotikëve”.

Vëllimi i dytë i raportit analizon krimin financiar, duke qenë se lidhet ngushtë me krimin e organizuar.  Sa i përket pastrimit të parave dhe krimit financiar, raporti thotë se qeveria shqiptare nuk ka bërë ndonjë progres të ndjeshëm gjatë 2018-ës. Shqipëria është një vend vulnerable ndaj pastrimit të parave si pasojë e korrupsionit, rritjes së krimit të organizuar, si dhe institucioneve qeveritare të dobëta.

Ekonomia informale dhe e varur nga paraja cash vlerësohen gjithashtu të jenë problem për vendin. Kontrabanda dhe falsifikimi i produkteve vlerësohen nga Departamenti Amerikan i Shtetit si krime të përhapura financiare në vendin tonë. Kontrabanda, thotë Dash, nxitet edhe nga kontrolli i dobët kufitar. “Reforma në drejtësi ka dhënë shpresë se do t`i adresojë çështjet si pastrimi i parave dhe krimet financiare”-nënvizon DASH.

Por, gjithsesi, këto përpjekje, pra reforma në drejtësi sfidohet nga korrupsioni depërtues”, nënvizon më tej. Edhe ndalimi me ligj i kumarit vlerësohet nga DASH si një lëvizje që do të frenojë disi pastrimin e parave, duke qenë se ky sektor, se bashku me atë të pasurive të paluajtshme vlerësohen si kyç në skemat e pastrimit të parave.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.