Debate për “superpagat” e Vetting-ut – Kreu i KPA kërkon personel e shpërblime shtesë. Fino: E ke rrogën 4.6 milionë, mos abuzoni
Kërkesat e Kolegjit të Posaçëm të Apelimit për shtesa në personel e paga, ka shkaktuar debate në Komisionin Parlamentar të Ligjeve, ku u diskutuan të martën buxhetet e organeve të drejtësisë. Kreu I Kolegjit Albana Shtylla kërkoi shtesë të numrit të këshilltarëve si dhe të shpërblimeve të tyre për shkak të fluksit shumë të madh të punës. Ajo tha se dosjet e subjekteve të Vetting-u shkojnë deri në 8 mijë faqe, dhe se vonesat për shkak të personelit do sillnin rrezikun që gjyqtarët e prokurorët e shkarkuar të fitonin në Strasburg për mosrespektim procedurash.
Por nuk ishin dakord me këto kërkesa Ulsi Manja, Kreu i Komisionit dhe Bashkim Fino, relator i projektbuxhetit. Fino u shpreh kritik me faktin që Kreu i KPA ka pagën më të lartë në administratë, në nivelin e 4.6 milionë lekëve në muaj, ndërkohë që kërkon edhe disa paga shpërblim pasi mbaron mandatin.
Kolegji i Posaçëm i Apelimit ka pranuar 147 ankime dhe ka dhënë 77 vendime lidhur me subjektet e Vetting-ut, shifra që u konsideruan të ulëta nga deputetët e Komisionit Parlamentar të Ligjeve.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.