Debati për Teatrin Kombëtar – Aktorët, takim me Veliaj. Të përçarë në qëndrime

Kryetari i Bashkisë së Tiranës, Erion Veliaj ka zhvilluar një dëgjesë me artistët lidhur me fatin e truallit dhe godinës së Teatrit Kombëtar.

Kryebashkiaku Veliaj ka argumentuar se është domosdoshmëri  ndërtimi i një Teatri të ri me kushtet më moderne për aktorët, por duke qenë se ka një kosto prej 30 milion eurosh, është parë mundësia e ndërtimit përmes partneritetit publik-privat.

Ndërsa nga ana e tyre, aktorët nuk kanë qenë me një qëndrim unanim. Disa prej tyre nuk tërhiqen nga vendimi i për të mos lejuar transformimin e Teatrit Kombëtar, duke e cilësuar si vend të shenjtë dhe si identitet të qytetit, ndërsa të tjerë janë pro idesë së ndërtimit të një godine të re.

Një pjesë e aktorëve, që e kanë mbrojtur që në fillim idenë për të mos lejuar transformimin e godinës aktuale të Teatrit, kanë kërkuar nga Bashkia e Tiranës që ta rikonstrukturojë atë për të siguruar kushte të mira, si një mënyrë që kushton më pak. Por ka edhe nga ata që mendojnë ndryshe.

Në fillim të vitit është prezantuar projekti i ri për Teatrin Kombëtar, çështje kjo që ka ngjallur reagim në radhët e artistëve të cilët kundërshtojnë vendimin për prishjen e godinës së Teatrit Kombëtar dhe ndërtimin e një godine të re.

Elisabeta Dosku/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.