Dëbora dhe përmbytjet bëjnë ‘kërdinë’ në Ballkan – Mbi 50 trena pezullojnë nisjet e planifikuara

Dëbora e madhe dhe përmbytjet shkaktuan dëme në shumë vende të rajonit të Ballkanit ditën e premte, duke sjellë kështu bllokimin e rrugëve, ndalimin e trageteve përgjatë bregut të Adriatikut si dhe përmbytjen e shumë shtëpive.

Vërshimi i dëborës erdhi pasi Kroacia tashmë po përpiqej të menaxhonte lumenjtë e tejmbushur nga shkrirja e borës.

Sipas ‘AFP’, autoritetet kroate thanë se vetëm automjetet e vogla janë lejuar të kalojnë në rrugët kryesore drejt bregdetit, duke pezulluar kalimin e kamionëve e autobusëve. Ndërkohë, qytetarëve u është kërkuar që të shmangin udhëtimet.

Dëbora ka rënë gjithashtu në Serbinë fqinje, duke e habitur rajonin në fillim të pranverës, ndërkohë që shkrirja e borës ka sjellë përmbytje edhe në Bosnje. Ambasada e SHBA në kryeqytetin serb, Beograd, njoftoi mbylljen e saj të premten për shkak të motit të keq, duke lajmëruar gjithashtu edhe pezullimin e emërimeve për shërbimet konsullore.

Ndërkohë, në vendin tonë bora dhe shiu përfshinë zonat veriore dhe veriperëndimore, duke shkaktuar përmbytjen e 5000 hektarëve tokë, 680 shtëpi, si dhe shkolla të prekura nga përmbytjet. Familjet u evakuan nga zonat e prekura nga përmbytjet dhe u strehuan nga autoritetet.

Në Rumani, po ashtu bora e madhe dhe era e fortë çuan në mbylljen e shkollave në kryeqytet dhe 10 qytete të tjera. Ndërkohë, gjashtë autostrada kryesore u mbyllën për shkak të dëborës, duke devijuar kalimin në rrugë të tjera si dhe më shumë se 50 trena nuk bënë nisjen e tyre sipas planifikimit.

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.