Dëgjesa me qytetarët – Rama: ”Rruga e Arbrit”, zotimi ynë që të ndërtohet brenda këtij mandati
Kryeministri Edi Rama dhe kabineti qeveritar po zhvillojnë një dëgjesë me qytetarët e Dibrës për planet e zhvillimit dhe shërbimeve. Fokusi kryesor i kësaj dëgjese është edhe prezantimi i projektit për ‘Rrugën e Arbrit’.
Rama u shpreh në fjalën e tij se ministri i Infrastrukturës dhe Energjisë, Damian Gjiknuri së bashku me ekipin e tij po diskutojnë për kontratën dhe kompaninë fituese. Sa i përket përfundimit të këtij projekti, Rama shtoi se:
“Zotimi ynë është që kjo rrugë të ndërtohet brenda këtij mandati, si nga pikëpamja e projektit teknik ashtu edhe nga financimet.”
Në projekt janë parashikuar 40 km, duke bërë të mundur lidhjen e Klosit dhe të Burrelit me këtë aks. Sipas Ramës, kjo do të përgjysmojë kohën dhe distancën e mbërritjes së qytetarëve në kryeqytet.
“Rruga në projekt ka një përmirësim të konsiderueshëm për sa i përket lartësive dhe urave të trajektores. Do të bëhet me gjysmën e kostos së parashikuar me idenë e vjetër, që ishte një marrëzi.”
Me ndërtimin e kësaj rruge, kryeministri Rama tha se Dibra do të bëhet një lagje e madhe, duke u kthyer në oborrin e pasmë të metropolit. Po ashtu, ai e cilësoi “Rrugën e Arbrit” edhe si një projekt strategjik.
“Rruga e Arbrit një projekt strategjik për lidhjen me krahun tjetër të kufirit siç është Dibra e Madhe kemi nisur të diskutojmë me qeverinë maqedonase që edhe nga ana e tyre të ndërtohet pjesa e mbetur, e kjo do ti japë një fluks Rrugës se Arbrit.”
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.