Dekreti për përmbaruesit privatë- Votimi këtë të enjte në seancë plenare
Në seancën plenare, të enjten, do të diskutohet dekreti i Presidentit që rikthen për rishqyrtim ligjin “Për Shërbimin Përmbarimor Gjyqësor Privat”, sipas arsyetimit bashkëlidhur këtij dekreti, të dërguar nga presidenti i Republikës, Ilir Meta. Kreu i shtetit ka dhënë një serë argumentesh se pse ky ligj bie ndesh me Kushtetutën dhe ka nevojë që të rishikohet në mënyrë që të mund të marrë dekretimin e fuqinë ligjore që e vë në zbatim. Në listën e gjatë të argumenteve, kreu i shtetit ka ngritur pikëpyetje mbi 6 nene të ligjit të ri të përmbarimit që kanë të bëjnë me mbledhjen e detyrimeve financiare me mirëkuptim, caktimin e numrit të përmbaruesve, mbikëqyrjen e shërbimit nga vetë Dhoma e përmbaruesve, numrin dhe licencat e këtyre profesionistëve, si dhe faktin që ata duhet t’i nënshtrohen Vetting-ut.
Javën e kaluar, Komisioni i Ligjeve e ka rrëzuar dekretin e Presidentit Ilir Meta që ktheu për rishqyrtim nga Kuvendi Ligjin për Përmbarimin Privat, veprim që parashikohet të reflektohet edhe në votën parlamentare.
Ligji është miratuar pak kohë më parë edhe është pjesë e paketës së ndryshimeve ligjore që vijnë si rrjedhojë e reformimit të sistemit të drejtësisë.
Në relacionin e deputetëve dhe në raportin e Komisionit për Çështjet Ligjore, Administratës Publike dhe të Drejtave të Njeriut është shprehur se qëllimi i këtij ligji është: ridimensionimi i shërbimit përmbarimor gjyqësor privat në terma të rritjes së eficencës për proceset e ekzekutimit; rritjes së besueshmërisë së publikut përkundrejt këtij profesioni; rritjes së profesionalizmit, përgjegjshmërisë dhe llogaridhënies në ushtrimin e këtij profesioni si përmbarues etj.
Në këtë dokument, veç të tjerash, është vlerësuar se detyra që ushtron një përmbarues privat konsiderohet si një funksion publik i deleguar, nisur nga rëndësia që ka procedura e ekzekutimit të titujve ekzekutive. Bazuar në këto parime dhe principe kryesore, është organizuar dhe funksionon shërbimi përmbarimor gjyqësor shtetëror apo privat. Po ashtu, përcaktohet numri i përmbaruesve gjyqësore për raportin e popullsisë (1 përmbarues për 20 mijë banorë).
Shërbimi përmbarimor shqiptar është një sistem dual që realizohet si nga Shërbimi Përmbarimor Gjyqësor Privat, ashtu dhe nga Shërbimi Përmbarimor Gjyqësor Shtetëror.
Elefteria Zguri/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.