Del vendimi/ Kush përjashtohet nga ‘bonusi i luftës’ 40 mijë lekë! Si përfitojnë ata që janë larguar nga puna
Qeveria shqiptare ka miratuar një fond në masën 7 miliardë e 40 milionë lekë për t’ua shpërndarë si ndihmë financiare të punësuarve aktualë dhe punonjësve të larguar nga puna si pasojë e masave parandaluese për përhapjen e COVID-19.
Vendimi i publikuar tashmë në Fletoren Zyrtare përcakton dhënie ndihme financiare prej 40 000 (dyzet mijë) lekësh për të punësuarit në subjektet me të ardhura vjetore mbi 14 000 000 (katërmbëdhjetë milionë) lekë, që kanë mbyllur aktivitetet sipas urdhrave të ministrit të Shëndetësisë dhe Mbrojtjes Sociale, të cilët kanë qenë në punë në datën e hyrjes në fuqi të këtyre urdhrave.
Po ashtu, përfitojnë ndihmë financiare prej 40 000 (dyzet mijë) lekësh ish-punësuarit në subjektet që janë lejuar të kryejnë aktivitetet sipas urdhrave të ministrit të Shëndetësisë dhe Mbrojtjes Sociale, të cilët janë larguar nga puna nga data e hyrjes në fuqi të këtyre urdhrave deri në datën 10 prill 2020. Dita e dorëzimit të E-sig 027 nuk duhet të jetë më e vonë se data 10 prill 2020.
Po ashtu, vendimi përcakton dhënie ndihme financiare prej 40 000 (dyzet mijë) lekësh për të punësuarit në subjektet me të ardhura vjetore deri në 14 000 000 (katërmbëdhjetë milionë) lekë, që janë lejuar të kryejnë aktivitetet sipas urdhrave të ministrit të Shëndetësisë dhe Mbrojtjes Sociale, të cilët kanë qenë në punë deri në datën e hyrjes në fuqi të urdhrave të ministrit të Shëndetësisë dhe Mbrojtjes Sociale.
Vendimi përcakton që këtë ndihmë financiare e përfitojnë dhe punonjësit e sektorit të turizmit.
Kush përjashtohet
Nuk e përfitojnë ndihmën punonjësit të cilët kanë përfituar nga paketa e parë e ndihmës 26 mijë lekë.
Po ashtu, nuk përfitojnë të punësuarit në subjektet:
-me objekt veprimtarie tregtim të produkteve ushqimore, fruta – perime, farmaceutike;
-e regjistruara që ushtrojnë aktivitet në profesione të tilla si: avokat, noter, mjek i specializuar, farmacist, infermier, veteriner, arkitekt, inxhinier, mjek-laborant, projektues, ekonomist,agronom, ekspert kontabël i regjistruar, kontabilist i miratuar dhe vlerësues i pasurisë, që lejohen të kryejnë aktivitetin sipas urdhrave të ministrit të Shëndetësisë dhe Mbrojtjes Sociale.
Aplikimi për të përfituar ndihmë financiare bëhet nga subjekti i të punësuarit. Punonjësi që është në më tepër se një listëpagesë përfiton si ndihmë financiare vetëm një pagesë.
Për të përfituar nga ndihma financiare duhet që punonjësi të ketë qenë në marrëdhënie pune deri në datën e hyrjes në fuqi të urdhrave të ministrit të Shëndetësisë dhe Mbrojtjes Sociale.
Subjektet aplikuese duhet të paraqesin pranë Drejtorisë së Përgjithshme të Tatimeve, nëpërmjet portalit e-filing, kërkesën me të dhënat e përfituesve, ku përfshihen:
a) të dhënat identifikuese të subjektit tatimpagues të pajisur me NIUS;
b) të dhënat identifikuese të përfituesve, përfshirë:
-emrin, mbiemrin, numrin e telefonit, adresën e-mail-it;
-numrin personal të identifikimit të përfituesit;
-bankën ku përfituesi ka llogarinë rrjedhëse bankare;
-BAN-in e llogarisë bankare.
Nuk përfitojnë ndihmë financiare, sipas këtij vendimi,:
a) individët e punësuar, të cilët kanë realizuar për vitin 2019 të ardhura bruto nga paga mbi 2 000 000 (dy milionë) lekë;
b) individët e dypunësuar, ku njëri prej aktiviteteve bën pjesë në kategorinë e aktiviteteve të përmendura në shkronjën “b”, të pikës 4, të kreut I, të këtij vendimi;
c) punonjësit e institucioneve shtetërore si dhe të punësuarit në shoqëritë me kapital shtetëror;
ç) organizatat jofitimprurëse.
Procedura e përfitimit
Administrata tatimore, brenda 10 (dhjetë) ditëve pune nga data e aplikimit, verifikon në sistemin tatimor, identifikon aplikuesit dhe të dhënat në kërkesën e tyre, duke analizuar:
a) tatimpaguesin dhe veprimtarinë e tij, për të verifikuar nëse bën pjesë në listën e veprimtarive që përfitojnë ndihmën financiare;
b) krahasimisht listën e paraqitur për përfitim ndihme me listëpagesën e dorëzuar në mënyrë elektronike;
c) të ardhurat e realizuara nga subjekti.
Me qëllim shmangien e abuzimit, strukturat e administratës tatimore, duke përdorur analizën e riskut, mund të kryejnë edhe verifikime në subjektet aplikuese nëse përmbushen kriteret.
Drejtoria e Përgjithshme e Tatimeve I paraqet Drejtorisë së Përgjithshme të Thesarit listën përmbledhëse të individëve përfitues të ndihmës financiare, me të dhënat e mëposhtme:
a) Emrin, mbiemrin, numrin e telefonit, adresën e-mail-it;
b) Numrin personal të identifikimit të përfituesit;
c) Bankën ku përfituesi ka llogarinë rrjedhëse bankare;
ç) IBAN-in e llogarisë bankare.
Drejtoria e Përgjithshme e Thesarit kryen pagesat për individët përfitues, sipas këtij vendimi.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.